Søndag blir det avgjort: Rykker Brann ned i 1. divisjon eller ei? Med kring 14.000 selde billettar per i dag, blir kampen truleg utseld og tribunane fulle. Sikkerhetssjefen er ikkje spesielt uroa, men er likevel på vakt.
– Det blir ein del kjensler i sving på søndag. Det er jo små bagatellar som kan snu situasjonen frå ein vanleg kamp til ein høgrisikokamp, seier sikkerheitssjef i SK Brann, Knut Iversen.
– Det kan vere ein straffe to minuttar på overtid. Det kan snu stemninga totalt. Men i utgangspunktet er det ein heilt vanleg kamp.
Men å kalle kampen på søndag for eit heilt vanleg oppgjer er i beste fall ei kraftig underdriving. For første gang på 29 år risikerer Brann å rykke ned til 1. divisjon. Brann bør helst vinne på søndag. Tapar dei rykker dei direkte ned. Spelar dei uavgjort er det fordel Sogndal før siste serierunde.
LES OGSÅ: «Dei store byane ser litt ned på oss bøndene frå Sogn. Då er det ekstra kjekt å ta dei litt»
– Aldri noko problem med sogndølene
Nærmare 1000 sogndøler er venta til Brann Stadion. Sikkerheitssjefen har berre gode ord å seie om bortesupporterane.
– Dei syng og trommar og lagar god stemning. Det er aldri noko problem med dei.
Salssjef i SK Brann, Dag Frode Algerøy, har hatt ei travel veke bak seg. Billettsalet til søndagens kamp går som det susar.
– Det er fantastisk. Eventyrleg bra. Historisk sett har me sett at folk engasjerer seg voldsomt i Brann når me er i toppen av tabellen og når me er i botn.
Supporteren i salssjefen er mildt sagt nervøs.
– Eg er så nervøs at eg må stå med hendene i lomma, for det sprutar sveitte ut. Eg må nesten ha nitroglyserin intravenøst. Det er forferdeleg spennande.
– Draumescenarioet er jo i andre enden av tabellen, der me kjempar for eit gull med fullsette tribunar. Men etter det så får me seie at dette er draumescenarioet, viss me var garantert å vinne dei siste kampane og greie oss, seier Algerøy.
LES OGSÅ: