Árdna - sámi kulturmágasiidna lea suokkardallan makkár plánat skearrolágadusain ja ártisttain leat boahtte jagi.
Suokkardallan čájeha, ahte don gii liikot sámi musihkkii duođaid sáhtát iluin vuorddašit boahtte jagi. Jahki 2008 oainnat sáhttá šaddat albma stuorra CD-jahki, sihke logu ja kvalitehta dáfus.
Dovddus ártisttat
Sámi dovddumus ártisttat eai leat gal áiddo láikošan maŋimuš áiggiid, go boahtte jagi ilbmadit sihke Mari Boine, Adjágas, Sofia Jannok, Transjoik, Niko Valkeapää, Ulla Pirttijärvi-Länsman, Johan Sara Jr., Inga Juuso, Ann-Mari Andersen ja Iŋgor Ánte Áilo Gaup skearru.
Maiddái dakkár ártisttat mat ovdal leat almmuhan dušše siŋŋeliid dahje radioi bádden moadde lávlaga almmuhit skearruid boahtte jagi. Dás sáhttá namuhit Per Tor Turi, Audhild Valkeinen, Áigi ja Annbjørg Susanna Hætta.
Ođđa jienat
Boahtte jagi beassá maid skearrus gullat nuorra ártisttaid ja joavkkuid mat máŋgasiidda leat eambbo apmasat. Dát leat Alit Boazu, SlinCraze, Elin Kåven, Anne Maddji Heatta ja Alias Ellen (Elle Márjá Eira).
Joavkkut mat eai leat vel áibbas vissásat das, ahte goas sin skearru almmuhuvvo leat Rolffa, Mollet ja Intrigue.
Eambbogo dábálaš
Dábálaš buori jagiid lávejit ilbmat sullii guhtta-čieža sámi musihkkaskearru. Mii eat dieđe lešgo goassige ovdal almmuhuvvon ná olu sámi skearrut go boahtte jagi, muhto dan gal roahkka sáhttá dadjat ahte boahtte jagi ilbmet mealgat eambbo skearrut go dábálaččat.
Árdna - sámi kulturmágasiinna guorahallamis ii leat iskojuvvon makkár juoigan-skearrut ilbmet boahtte jagi.
Loga maiddái: