PÅ NORSK:
(Muitaleaddji: Maret Anne Sara)
De lei siida, mas ledje guokte goađi: Nuppi goađis lei boares áhkku ja boares áddjá. Sudnos leai okta bártnáš. Nuppi goađis ges ledje ollu mánát ja okta biigá.
De vuoddjájedje goađi eaiggádat juovlabasiide Guovdageidnui. De šadde juovlabasit, ja mánát láveje álo stoahkat ja viehkat bielluiguin. Nuppi goađi bártnáš maiddái vikkai dohko, muhto boares áhkku ii luoitán. Dat logadii girjji, rissi nuppi gieđas.
Dalán go biigá manai bohccuid lusa, de dan nuppi goađi mánát vilddáske bearehaga. Mánát rigereje ja stohke nu fasttit ahte giehtadedje ovtta máná ja njuvve dan, ja ieža lohke:
- Sii leat niestebohcco njuovvan.
Go biigá bođii goađi lusa, de mánát dohppeje dan njuvvon máná čoliid ja dolvo goahtái ja bálkeste biiggá askái. Biigá suorganii hirbmadit. De manai biigá boares áhku goahtái. Áhkku neavvui biiggá:
- Bija dan unnimus máná giissá sisa ja coggal giissá soggái. Biigá ii šat duostan goađis orrut.
Das maŋŋelas oidne mánát go mánnu bođii smáhkkomuora ala, de šattai Stállun ja gottašii visot mánáid. De manai biigá dan boares áhku goahtái ja jearai movt son dál galggai. Áhkku vástidii:
- Dál galggat mannat ja váldit buoremus vuojána ja vuoddját Guovdageidnui, dohko márkanii.
De vieččai biigá vuojána ja manai áhku goađi lusa. Boares áhkku nevvui:
- Dál galggat mannat ja guovlalit uksagaskkas, ja jus Stállu jearrá maid siđat, de siđa dollarátti.
Biigá dagai nu, manai uksagaskii ja oainni ahte Stállu leai bidjan mánáid oivviid birra árrana bassut. De jearrá Stállu biiggás:
- Maid siđat?
Biigá siđai dollarátti, ja Stállu attii. De manai biigá ja suoládii unnimus máná čađa goađi olggos, rohttii loavddahealmmi vuoli. Ja válddii velá skupmoha ja njálfáhta. De manai son boares áhku goahtái. Boares áhkkui nevvui:
- Galgga bidjat skupmoha ja njálfáhta hui luovos, ja de go vuoddját galggat, galggat vuodjit njagumuora vuoli. De biigá vuoddjái ja oaidná vuojidettiin njagumuora alde lea mánnu.
Stállu lei mannan mánu hámis čohkkát dan muora ala. Ja go biigá vujii vuoli, de dohppii Stállu dan skupmoha ja njálfáhta. Muhto dat gal besse biiggá oaivvis ja báhce Stálu gihtii. Biigá beasai meaddel ja ollii gitta márkanii. Doppe son muitalii goađi eaiggádiidda, mii siiddas leai dáhpáhuvvan.
Álggos soai eaba gal jáhkkán, muhto maŋemus soai goit jáhkiiga. Go biigá lei muitalan buot, de son jámii dasa. Ja dat su stáinnat vuoján luoddanii ja šattai stuora geađgin.
De vuoddjáiga eaiggádat ja manaiga siidii. Go dohko bođiiga, de Stállu gottii sudno dakkaviđe. Dat boares áhkku, mii orui das, sirddii fargga eret doppe. Ja dan seammás olles dan siidda eallu šattai geađgin. Dušše dan boares áhku eallu birgii.
Durkkihanváris leat stuora geađggit, mat leat oaidnit dego guokte stuora goađi, ja smávva geađggit, mat leat dego bohccot mat livvadit máhcco-oivviid. Dat leat sihke vilges geađggit ja čáhppes geađggit.