PÅ NORSK:
(Muitaleaddji: Henry Ulvenes)
Guvrunáhkku ásai... Čulloveaiguoikka bokte lea suolu, eambbo Suoma bealde go dáčča bealde... ja Guvrunáhkus lei vissa geassesadji das. Nubbi lea ahte Guvrunáhkus ledje golbma bártni. Dat ledje erenoamáš beakkán searat, buorit báhčalit njuollabissuin, buorit bálkestit sáitti, ja buorit bállahastit geđggiin, deaivat maid nu.
Ja dat ásse dies, ja de dat lea dan muttos áigá dát dáhpáhus ahte čuđit lávejedje johtit dáppe maid deatnoráigge.
Ja de lei beaggán ahte čuđit leat jođus. Dábálaččat jos olbmot bohte dan diehtit, dat báhtaredje ja čiehkadedje. Naha, muhto Guvrunáhku bártnit dat eai háliidan čiehkadit dehe báhtarit. Dat ráhkkanedje Guvrungárgui iežaset geassesadjái, ráhkadedje gobiid, gos sii sáhttet náđđát ja geđget, jos bohtet čuđit dohko.
Šattai dien láhkai ahte de bohtet čuđit, lei veaigin go gánddat viehkaledje daidda sajiide, maid sii ledje ráhkadan ovdagihtii, vai besset báhčalit daid čuđiid. Ja nu čuđit go boahtigohte dohko, dat gálle dohko, lea coagis geasset. Dat Guvrunáhku bárdni, gii lei lagamusas, bážii njuollabissuin ja deaivvai vuosttaš čuđi ovttatmanus. Čuđit fuomášedje sin ja vulge dan guvlui. Bárdni gearggai báhčit vel ovtta ja geđgii dassái dat goddui.
Dat nubbi olmmái, mii maid lea dakko lahkosiin, dat lea oaidnán mii lea dáhpáhuvvan. Dat njáhká dakkár vuohkkasit sadjái, go oaidná gokko dat bohtet, ja doppe dat maid báhčá ovtta. Dat gahččá maid, dat čuhti, muhto ii muitaluvvo man sakka hávváduvai, jámii go dat vai movt?
Na goit gearggai dat Guvrunáhku bárdni maid geđget vel moaddása, ovdal go báhtarii ja čiehkadii, sus lei nu fasttes hávvi.
Dan goalmmáda eai leat fuomášan, ja dat njáhká dohko lahka. Manná veahá áigi, čuđit álget dola bidjat (dahkat) ja gáfestallat, boradit. Leat boraheame čuđiid šeaffa (hoavdda), dat lea máhka hávváduvvan, ja dan muttos heitot ahte ii nagot okto boradit. Eará čuohti addá dasa borramuša stuora niibbiin, mat sis leat. Ja dat Guvrunáhku bárdni, gii dál lea čiehkádan, das lea dakkár lihkku ahte go de áigu báhčit dan šeaffa, dehe dan gii lea su boraheamen, de deaivá juste gardnjilii dan čuđi, mii lea boraheamen šeaffa. Dat čuohti šaddá hoigadit dan hirbmat niibbi hoavdda čottaráigái. Dat earát eai leat fuomášan, mii lea dáhpáhuvvan: Dat rohkkáhit guhteguimmiideaset ja doarrájit gaskaneaset. Šaddá hirbmat stoaita: Guvrunáhku bárdni beassá báhtarit, čiehkada dehe manná báđa eret das.
Dien lean mun gullan olbmuid muitalan Guvrunáhku birra.