PÅ NORSK:
(Muitaleaddji: Øystein Nilsen)
Øystein Nilsen, ja dáppe Unjárggas orun ovtta báikkis, mas lea namma Ábbešborre (Abelsborg), ja Ábešborre lea 10 kilimehtera Vuonnabađas Čáhcesullo vuostá.
Gal han dáppe Sámis ja Unjárggas gal leat maid máŋga stálu muitalusa, ja okta lea dat go Ábrámš doarui stáluin. Ja dat lei nu ahte čađat de go stállu bođii, olbmot dat baláskedje, ja báhtaredje ja eai dal diehtán maid galge bargat go stállu bođii. Ja stállu lei stuoris ja gievra. Eai dat buohkat duostan stáluin heaibut gal.
Muhto Ábrámš gal duosttai, ja deaivvadeigga Stuoravuonas aiddo bajábeal dan internáhta. Gii dál vuodjá Stuoravuona meattá, oaidná internahta, ja dat gohčoduvvo Gáiccamiellin. Doppe Gáiccamielli alde, das dal deaivvadeigga ja de doarráiga. Dat manai nu ahte Ábrámš birgii gal aiddo dan stálus, ja nagodii goddit dan stálu. Muhto Ábrámš lei dan gullan ahte ii leat doarvái stálu goddit. Stálus lei beana maid, ja stállu lohká vel ahte:
”Ále gotte dan beatnaga gal! Jos áiggut goddit, oaččut mus niibbi dás, buikku, ja gottát dainna.”
Muhto Ábrámš diđii ahte jos son válddii stálu niibbi, de dalle gal ii jápmán dat beana. Nu ahte Ábrámš gottii maid dan beatnaga, ja dien láhkai dat gájui stuoravuotnalaččaid, go lei fitnen goddit sihke dan stálu ja dan beatnaga.
Die lei - dat dadjat - muhtun láhkai stálu noaidevuohta, ahte dat beana sáhtii ealáskahttit goddon stálu maiddái, ja stálus lea čađat beana fárus. Ja Ábrámššas leat dieđusge maŋisboahttit, olusat báhcán deike Stuoravutnii. Ja daid gaskkas gal lea dat Ábrámš muitalus dovddus, ja maiddái eanaš stuoravuonolbmot dovdet dan Ábrámš muitalusa.