Leat go goassege geahččan TV- dahje filmma ja jurddahallan mot son ráhkadit daid olu bávkkehemiid, dolaid, fastes máskkáid dahje hámaid, goansta rumašosiid ja eará erenoamáš goansttaid? Na, sámenieidda Eiva Marita Sara mielas goit ledje action-filmmaid bávkkeheamit nu gelddolaččat ahte mearridii dan valljet oahpposuorgin.
15 oahppi jagis
Sara lea okta 15 studeanttain geat dán jagi besse dán oahpposuorgái NISS - nammasaš skuvllas Oslos. Ja dáinna son háliida eallit boahtteáiggis. Dán oahpposuorgái liiko son go beassá nu viidát bargat; ii leat sáhká dušše ovtta teknihkkas dahje doaimmas.
Unnán barggut
Eiva Marita Sara lea bajásšaddan sihke Kárášjogas ja Troanddimis, ja háliidivččii soames beaivve Sámis bargat. Muhto jos dáinna fágasurggiin meinešii birget,de lea eanemus realisttalaš olgoriikas bargat. Norgga filmabiras ii leat ban nu stuoris, muhto son doaivu ahte oaččušii barggu go ráhkaduvvojit eanet aht eanet filmmat maiddái Norggas. Muhto stuorámus sávaldat livččii bargat sámi action-filmmaiguin.
Lassi oahppu olgoriikas
Dat mii su geasuha eanemusat, lea oaidnit mot son nagoda stivret ja hálddašit fámolaš ja várálaš goansttaid, nugo dolaid ja bávkkehemiid. Jus eanet galgá dan birra oahppat, de ferte joatkit oahpuin Englánddas. Ja son gal bealistis lea juo plánen dohko vuolgit vai olaha bachelor-dási ja ollašuhttá niegu ráhkadit filbma-bombaid Sámis.