Gaskavahku lei "rabas beaivi" Kárášjoga joatkkaskuvllas Kárášjogas. Dán oktavuođas lei NRK Sámis njuolggasátta webas man NRK Sámi njeallje nuorra oahpahalli jođihedje, sihke njuolgga jearahallamiiguin kamera ovddas studios, kamera duohken govvideaddjin ja reportárin ieš guđet ge dáhpáhusain skuvllas.
Konsentreret
Bealgoalmmat tiimma sátta gáibida olbmos ollu. Dan beasaiga Máret Ingá Smuk ja Vaino Rensberg vásihit go ain galggaiga ođđa olbmuiguin hállat áššiid birra masa eaba lean astan ráhkkanit ge.
– Mun šadden čuovvut mielde maid muitalit. Muđuid in livčče diehtán maid galggan ain jearrat sis, lohká Máret Ingá Smuk.
– Somá
Máren Iŋgá Baer gis lei govvideaddjin go soai reportáriin Máijá Holm Baltoin ain guovlaleigga man nu dáhpáhussii skuvllas.
– Veahá hušša, muhto hui somá, lohká Máren Iŋgá Baer.
– Dát lei juoga maid eat lean dahkan ovdal, nu ahte lei ođas ja suohtas, lohká gis Vaino Rensberg njuolgga neahttasáddaga birra.
Rápmi
Sihke oahpaheaddjit ja Sámi joatkkaskuvlla rektor, Åge Somby, rámidit nuoraid duostilvuođa. Somby muitala ahte Oahpahusdirektoráhtas ledje čohkán ja geahččan sáddaga ja háliidivčče fas diekkár fálaldaga skuvlii.
NRK Sámi oahpahalliid ortnega prošeaktajođiheaddji Berit Nystad ii jáhke ahte dát lea áidna njuolgga websátta maid bidjet nuoraid lágidit, muhto šattaš go sátta fas Sámi joatkkaskuvllas Kárášjogas, dan ii háliit gal lohpidit.