Sámediggepolitihkkárat gártet dál geahpedit iežaset ruhtageavaheami. Ruđat lávdegoddemátkkiide ja fágalávdegottiid oassálastimii semináraide ja konferánssaide, bissehuvvojit oalát.
Ná muitala Sámedikki dievasčoahkkinjođiheaddji Jørn Are Gaski.
Geavahan eanet diibmá
Čilgehus dása lea, go Sámediggi diibmá lea geavahan eanet ruđaid go galge. Badjelmearálaš geavaheapmi lei oktiibuot birrasii čieža miljon kruvnna. Danin mearridii Sámediggi geassemánus, ahte maiddái politihkkálaš dásis fertejit seastigoahtit.
- Jus politihkkárat liikká dáhttot oasálastit eará doaimmaide, de ii mávsse Sámediggi goluid, čilge Gaski.
Diimmáš ruhtageavaheapmi dagaha maid, ahte politihkkárat eai beasa deaivvadit álbmogiin nu ollu go ovdal.
Maiddái dán jagi ruhtageavaheapmi orru leamen badjelmearálaš. 2014-jahkebeallerehketdoallu čájeha, ahte lea dárbu vel eanet seastit doaibmagoluin politihkkálaš dásis.
Danin dáhttu dievasčoahkkinjođiheaddji joavkkuid plánet joavkočoahkkimiid dakkár sadjái, mii buvttášii nu unnán goluid go vejolaš.
