Mannan vahkkuloahpa lágiduvvojedje Verddečiekčamat Buvrovuonas. Sotnabeaivvi go Fávrrosordda čiekči Mikkel Isak Pulk lei páhkkemin iežas biilla, de iđistii nubbi biilla mas ledje juhkan nuorat. Sii huike fasttes sániid sápmelaččaid birra, muitala Pulk.
- Dat rahpe lasa ja huike, ahte sii leat hui bahá sápmelaččaide, diekkár oanehaš nevrriide, go vuojašedje čiekčanšiljjus.
Pulk ii dieđe geat nuorat ledje. Verddečiekčamiid lágideaddji Anne Berit Bæhr muitala ahte jus čájehuvvo ahte ledje čiekčit geat láhttejedje nie, de áigut lágideaddjit váldit oktavuođa joavkkuin gosa gullet.
Verddečiekčamiid ulbmil lea nannet verddevuođa gaskal siseatnama ja rittu, dán dáhpáhusa oaivvilda Bæhr čájehit, ahte lea dárbu dákkár doaluide.