Hopp til innhold

Rihkku go boazologu geahpedeapmi álbmotrivttiid?

Siviilaáittardeaddji lea dáhtton departemeantta ođđasit gieđahallat boazologu geahpedan ášši.

rein
Foto: Johan Ánte Utsi / NRK

Siviilaáittardeaddji lea guorahallan moaitámuša ovtta boazologu geahpedan áššis, muhto Eanandoallo- ja biebmodepartemeanta hilggui juo oktii dán. Siviilaáittardeaddji kánturhoavda Lisa Vogt-Lorentzen dadjá, ahte departemeanta ii leat váldán vuhtii álbmotrivttiid, go hilgu moaitámuša, ja lea dáhtton departemeantta ođđasit gieđahallat ášši.

2012:is gáibidii stáhta boazodoallohálddahus, ahte buot boazoeaiggádat Finnmárkkus fertejit geahpedit boazologu seamma proseanttain ieš guđet orohagas. Ollu boazoeaiggádiid mielas ii leat dát rehálaš, go máŋga boazodoalli stuoridedje ealuid, ovdalgo geahpedus gáibádus bođii.

Boazodoalli sádden ášši

Siviilaáittardeaddji lea guorahallan ovtta moaitámuša, maid muhtin boazodoalli lei sádden Eanandoallo- ja biebmodepartementii. Son fertii geahpedit 588 bohccos 323 bohccui, ja dasto ii leat vejolaš sutnje joatkit boazodoalus. Departemeanta hilggui moaitámuša, muhto Siviilaáittardeaddji lea gávdnan boasttuvuođaid departemeantta gieđahallamis, muitala Vogt-Lorentzen.

Son muitala, ahte departemeanta ii leat guorahallan rihkku go geahpedeapmi álbmotrievtti opmodatvuoigatvuođa paragráfa. Dattetge lea Siviilaáittardeaddji gáibidan departemeanta ođđasit gieđahallat ášši. Eanandoallo- ja biebmodepartemeanta duođašta NRK Sápmái, ahte sii leat ožžon reivve Siviilaáittardeaddjis, muhto eai vuos kommentere ášši dađi eanet.

Guldal ášši:

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.