Hopp til innhold

100 jagi luonddu ovddas

- Go doarru luonddu beali, de gal ferte doarrut agálaččat, muitala Gunnar Reinholdtsen.

Skogvern
Foto: Norges Naturvernforbund

100 jagi lea Norgga Luonddugáhttenlihtu dorron luonddu bealis. Maŋŋebárgga rahpá Girkonjárgga bibliotehka golbma sierra čájáhusa, gos Luonddugáhtten lihtu čájeha maid sii leat dahkan dan 100 jagis.

Gunnar Reinholdtsen, gii lea stivrraláhtu Finnmárkku Luonddugáhttenlihtus, dadjá ahte ulbmil govvačájáhusain lea čájehit, maid Luonddugáhttenlihtu lea dahkan dán 100 jagis, dan rájis, go vuođđuduvvui. Jagiid mielde leamašan muhtin vuoittut, muhto go doarru luonddu beali, de gal ferte doarrut agálaččat, muitala Reinholdtsen.

Áltá dehálaš

Álttá-ášši lei jorggáldat luonddugáhttenáššiiguin, vaikko vuoittáhalle, ja Álttá- buođđu huksejuvvui, de dagahii ášši, ahte eiseválddit válde luondduberošteddjiid duođalaččat. Ain leat stuorra hástalusat Luonddugáhtten lihtus. Dálkkádatrievdadeamit ja luondduvalljodat leat sin guokte váldoášši.

Čájáhus rahppojuvvo maŋŋebárgga diibmu 13 Girkonjárgga bibliotehkas. Leat golbma čájáhusa, nubbi lea Bioforska ja Finnmárkku fylkkamánni, mat čájehit luonddugáhttenguovlluid Norgga, Ruošša ja Suoma rájáin. Vigdis Våvang fas álmmuha ođasmáhtton J.A.Friis girjji, mii lea historjjálaš dokumeanta davviguovlluide.

Korte nyheter

  • – Alimus Hálddahusriekti bágge ii-sápmelaččaid Sámediggái 

    Sámiráđi ságadoalli Áslat Holmberg oaivvilda, ahte Suoma Alimus Hálddahusriekti (AHR) badjelgeahččá sámi álbmoga.

    – AHR lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii, oaivvilda Holmberg.

    AHR lea mearridan, ahte mannan čavčča sámediggeválggaid galgá lágidit ođđasit.

    Riekti lea gieđahallan badjel čuođi sámediggeválggaid válgalogahallama ja válgabohtosa guoski váidaga.

    – AHR fas bágge Sámedikki dohkkehit 72 ii-sápmelačča ižas jienastuslohkui. Ná áitá Sámedikki legitimitehta sápmelaččaid ovddastanorgánan, cuiggoda Holmberg.

    Aslak Holmberg
    Foto: Piera Heaika Muotka / Sámiráđđi
  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset