Ii ožžon čájehit gullevašvuođas

Australialaš aborigiidnačorpmastalli Damien Hooper dagahii smávva stuimmi Londona olympiagilvvuin, go bođii čorpmastallamii aborigiidnaleavggat báiddiin.

Dan ii livččii galgan dahkat go rihkku OG njuolggadusaid ja lea dál ožžon váruhusa.

Rihkku gilvvuid njuolggadusaid

20-jahkásaš Damien Hooper lea olympiijadebutánta ja Australia čorpmastallanjoavkku stuorámus medáljadoaivva.
Vuosttaš OG-čorpmastallamii vuossárgga dárbbašii son erenomaš ollu movtta. Danin lei coggan T-báiddi, man ratti deavdá stuorra aborigiidnaleavga.

Dasa eai goittotge liikon Australia olympiijanjunnošat, dasgo dat rihkku gilvvuid njuolggadusaid.
Daid mielde oainnat ii leat lohpi gilvvuid oktavuođas moge čájehit miela dahje čalmmustahttit politihkalaš ja čearddalaš oainnuid dahje oskku.

Dalán dáhpáhusa maŋŋá celkkii Damien Hooper iežas leat rámis, go čájehii aborigiidnaleavgga ja iežas gullevašvuođa OG-doaluin.
Iige loga jurddašan dađi eanet makkárge njuolggadusaid dahje politihka. Son lohká aborigiidnaleavgga ovddastit sutnje baicca bearraša ja soga.

Beasai joatkit ja vuittii

Aborigiidnaleavga lea ovdalge oidnon OG oktavuođain, jagis 2000 Sydneys go austrálialaš luođovaláštalli, Cathy Freeman loktii aborigiidnaleavgga medáljaviehkamis maŋŋá.

Hooper vuittii Marcus Browne.

Foto: JACK GUEZ/Afp

Ovtta gaskka lei eahpečielggas sáhttágo Hooper oppa joatkitge gilvvuin,
Dál lea goittotge atnon ándagassii Australia OG njunnožiin, ja lohpidan ahte lobihis báidi ii šat dihtto, muitala riikka Olympiijajoavkku jođiheaddji Nick Green The Age neahttaaviisii. Riikkaidgaskasaš olympiijalávdegottisge lohket duhtat mearrádussii.

Lešgo ávki báiddis vai buori jurdagiin, Hooper goittotge vuittii čorpmastallama USA Marcus Browne vuostá 13 - 11. Čuovvovaš geardde čorpmastallá Hooper olympiijadoaluin lávvardaga, go deaivá ovddeš Eurohpá ja máilmmimeaštára Ruošša Egor Mekhontseva, dalle goittotge leavgabáiddi haga.

GULDAL: