På kjøkkenet står 8 kilo klippfisk, 17 kilo tomatar og 13 boksar med andelår spesialimportert frå Frankrike. Mie Myhrvold og Per Kristian Johansen er klare for storinnrykk.
– Me satsar på at rundt 150 kjem innom, seier Per Kristian Johansen og ser seg rundt i leilegheita på 60 kvadratmeter på Tøyen i Oslo.
Dei veit ikkje kven gjestane er, alt dei har gjort er å lasta opp informasjon om hendinga på Facebook og på nettsidene til Restaurant Day, eit nytt konsept som blir omtala som eit "internasjonalt mat-karneval" der alle kan opna sin eigen restaurant eller kafe for ein dag.
– Går i minus
Gjestene som kjem til pop-up-restauranten på Tøyen kan velje mellom bacalao og andeconfit-salat, rettane kostar berre 100 kroner per porsjon.
– Me kjem til å gå i minus, det er heilt klart. Me skulle gjerne ha gjeve vekk maten, men det har me ikkje råd til. Me gjer ikkje dette for pengane si skuld, seier Per Kristian Johansen.
– Me gjer dette fordi det er gøy. Me møte nokon som arrangerte Restaurant Day i august, og bestemte oss for å prøva dette ut sjølve, seier Mie Myhrvold.
– Eg har lenge hatt ein fjern draum om å starta opp eigen restaurant. No har me mogelegheita til å prøva, i alle fall. Me lærer å tenke logistikk, organisera kjøkkenet, rekna ut kor mykje råvarer me treng og laga budsjett, seier Per Kristian Johansen.
Gjev vekk overskottet
Restaurant Day vart arrangert for første gong i Noreg i november 2012, då var det 4 restaurantar som deltok. Ifølgje det interaktive kartet til Restaurant Day er det denne gongen 12 pop-up restaurantar i Noreg; av dei er 10 i Oslo, 1 i Kristiansand og 1 i Tønsberg (sja meir nedst i saka).
– Me likar å utfordra det etablerte, me tenker me må sjølve skapa liv i vår eigen by, seier Thomas de Vries, leiar for Breakfast Reklamebyrå Tønsberg.
Laurdag blir reklamebyrået gjort om til restaurant, med to typar supper på menyen.
– Me har lokale i ei gamal kyrkje som passar godt til restaurant. No har me dekka på med kvite dukar, me har kyrkjebenker og langbord. Overskottet går til Frivillighetssentralen i Tønsberg, seier de Vries.
Fleire av spontan-restaurantane samlar inn pengar til gode formål. Kafeen Sweet Rendezvous serverer kaker i Deichmanske bibliotek på Majorstuen i Oslo, overskottet går til ein seks år gamal gut som har blitt operert for hjernekreft.
Artikkelen held fram under bildet
Her kan du få med deg Restaurant Day på laurdag:
- «Spice Quarter» serverer midtausten-inspirert mat i Københavngata 2, Oslo kl. 12.30-16.00
- «Spansk korrupsjon VI» byr på spansk tapas i Tordenskiolds gate 3, Oslo kl. 17–21
- «JBG74» serverer bacalao og Andeconfit-salat i Jens Bjelkes gate 74, Oslo kl. 13–20
- «Winter is Coming» freistar med økologisk mat og drikke i Nordenhovgate 11B, Oslo kl. 12–17
- «Vin og grønt» byr på ein firerettars meny i Sandakerveien 8C, Oslo kl. 20-22.30
- «Eastern Promises» freistar med det beste frå det austeuropeiske kjøkkenet i Maridalsveien, Oslo kl. 15–19
- "What's (so) up?" er arrangert av det norske vegansamfunnet som stiller med heimelaga suppe og kakao i Korsgata 16, oslo, kl. 13–19.
- "Frokosteriet" freistar med heimelaga frukost i Grønnegata 14D, Oslo, kl. 10–14.
- "Open Food" lover suppe frå Slovakia og ein kinesisk spesialitet laga av ein ungarsk kokk i Storgata 63, Oslo.
- "Sweet Rendezvous" stiller med churros, bananbrød og Nutella-kake i Harald Hårfagres gate 2, Oslo kl. 11:00-15:00
Tønsberg:
- "Slurp!" er eit suppekjøkken i Tønsberg i den nedlagde kyrkja i Møllergaten 6.
Kristiansand:
- "Restaurant Day Fish and Chips" er arrangert av Kristiansand Food Club, og serverer .... ja, du gjetta det, i Rådhusgata kl. 11:00-17:00