9. juni er det verdspremiere på operaen «Waiting for Miss Monroe» i Den nederlandske nasjonaloperaen i Amsterdam, med den amerikanske sopranen Laura Aikin i hovudrolla som Marilyn Monroe.

Musikken i den nye operaen er av den nederlandske komponisten Robin de Raaff (f. 1968), og librettoen er skriven av Janine Brogt.

Fascinert av fortrulege lydband

Robin de Raaffs interesse for Monroe byrja med at han vart tiltrekt av 1950-talets design, som han oppfatta som naivt optimistisk. Monroe såg han først og fremst på som eit ikon for tiåret og som verdas første superstjerne.

– Men det var ikkje før eg las Marilyn Monroes «hemmelege lydband» eg forstod at eg var på sporet av noko ekte og svært kraftfullt, seier de Raaff til musikkbloggen Slipped Disc.

Statsadvokaten John Miner offentleggjorde i 2005 transkripsjonar av lydband Monroe skal ha lese inn til psykiateren sin, Ralph S. Greenson, like før ho døydde. Lydbanda vart seinare truleg øydelagde av Greenson.

– Å sjå denne superstjerna i total einsemd, medan ho deler sine innarste tankar med noko så uromantisk som ein bandopptakar, fascinerte meg. Desse svært fortrulege stundene vart tråden som heile dramaet om hennar liv og død kretsa rundt, seier de Raaff.

Les: – Monroe begikk ikke selvmord

– Hadde glimrande timing som songar

Handlinga i «Waiting for Miss Monroe» er lagt til dei siste månadene i Monroes liv, og andre akt startar med hendingar knytt til den berømte framføringa av «Happy Birthday» til John F. Kennedy i mai 1962.

Både president Kennedy, broren Robert, Clark Gable og Monroes eksmann Joe DiMaggio dukkar opp på scenen. Raaff er begeistra for Monroe som songar:

– Det var heilt logisk for meg å la Marilyn Monroe vere ein syngjande karakter, ikkje berre fordi ho sjølv song i sine filmar, men fordi eg faktisk synest ho hadde glimrande timing som songar, og ei svært god og velklingande stemme i det lave registeret. Den er motsatsen til den stort sett lyse talestemma ho brukte, seier Robin de Raaff.

Les: Slik har du aldri sett Monroe

Får kjendisane eit varig liv på operascenen?

Marilyn Monroe er ikkje den første kjendisen frå nyare tid som har fått nytt liv på operascenen; sist vinter vart det til dømes mykje oppstyr kring Mark-Anthony Turnages opera «Anna Nicole» om den kontroversielle kjendismodellen Anna Nicole Smith.

Hausten 2011 vart det kjent at komponisten Jonathan Dreyfus jobbar med ein opera om Julian Assanges liv for den australske nasjonaloperaen, og her heime fekk sjølvaste Noreg–Brasil nyleg operaformat i hendene til Are Kalvø og Helge Førde.

Marilyn Monroes liv har også vorte behandla både i ballett, musikal og i opera tidlegare, men med moderat suksess – Ezra Laderman og Norman Rostens opera «Marilyn» fekk til dømes hard medfart etter premieren i 1993.

Ein av få personar frå vår eiga tid som truleg er sikra varig liv på operascenen er Richard Nixon, som vert portrettert av komponist John Adams og librettist Alice Goodman i «Nixon in China» frå 1987.

«Nixon in China» får nemleg stadig nye oppsetjingar, og er generelt anerkjent som eit solid stykke musikkteater. Det vil vise seg om Robin de Raaff klarer å gjere noko tilsvarande for Marilyn Monroe.

Sjå i nett-tv: Bokprogrammet om Marilyn Monroe