NY Times: - Knausgård er den europeiske «bad boy»

Karl Ove Knausgård blir no lansert i USA som den norske Marcel Proust.

Foto: Roald, Berit/Scanpix

The New York Times er ute med stort oppslag om «My Struggle», som no er lansert i USA.

Maren Kvamme Hagen

Publisert 20.06.2012 23:40.

Skriv ut
Del/tips

Første bind av «Min Kamp» av Karl Ove Knausgård er nyleg lansert i USA, med tittelen «My Struggle». Boka får no drahjelp frå prestisjetunge The New York Times, som denne veka lagde stort oppslag om Mr. Knausgaard.

Dei kallar han «ein europeisk bad boy» og skildrar han som «høg, intens og rufsete kjekk, med trekk som utydeleggjerast av det utstuderte rotete håret, bart og skjegg».

NY Times slår også eit slag for forbrukarrettleiing, og presiserer for sikkerheits skuld at namnet blir uttalt «Kuh-NOWS-guard».

Fjerna roman-omgrepet

Avisa har merka seg den store etiske debatten som kom i Noreg i kjølvatnet av bøkene. «Amerikanske lesarar, som er vant til dårleg skjulte biografiske romanar og usensurerte memoarar, må lure på kva alt bråket handlar om. Men i Skandinavia, som har ein sterk lutheransk kultur, synest mange kommentatorar at Knausgård krenka grunnleggjande sosiale normer», skriv dei.

Boka blir gitt ut av Archipelago Books, som har bestemt seg for å fjerne roman-merkelappen på bokomslaget.

– Det var eit heilt bevisst val å ikkje merke boka for lesaren. Eg synest at prosjektet ligg komfortabelt mellom fiksjon og memoar. Kvifor skal ein prøve å definere eller merke den? seier grunnleggjaren av forlaget, Jill Schoolman, til NY Times.

(Artikkelen held fram under biletet)

Slik såg det ut då Karl Ove Knausgård og suksessforfattaren Siri Hustvedt møtte kvarandre i New York førre månad.

Foto: Jon Gelius/NRK

– Ein norsk Proust

Forlaget slår på stortromma og marknadsfører forfattaren som «ein norsk Marcel Proust». USA er det 15. landet boka blir lansert i og den har fått gode kritikkar dei fleste plassar, som Sverige, Danmark, Tyskland, Storbritannia og Nederland.

Karl Ove Knausgård var sjølv til stade på litteraturfestivalen PEN World Voices førre månad, der han vart intervjua av den kjende norsk-amerikanske forfattaren Siri Hustvedt.

LES: Knausgård lanseres i USA

– Eg likar boka veldig godt, det er eit ekstraordinært verk. Eg har aldri tidligare lest ei tilsvarande bok. Eg er imponert over Knausgård, uttalte Hustvedt til NRK i den anledning.

Men Knausgård var tilbakehalden med å håpe på for mykje:

– Får ein kritikk i The New York Times av ein som ikkje likar deg, kan det bli vanskeleg. Men får ein nokon som synest boka er heilt fantastisk, så byrjar ting å hende, sa forfattaren til NRK.