Det nynazistiske bandet Nothung var eit av fem band som spelte på ein konsert arrangert av nettstaden Frihetsrock i Jönköping førre helg. Festivalen gav seg ut for å vere ei bursdagsfeiring, men viste seg å vere eit treff som samla rundt 300 nynazistar frå mellom anna Sverige og Tyskland.

David Lagerlöf i det svenske antirasistiske tidsskriftet Expo bekreftar at scena for «kvit maktmusikk» er i framgang, og viser til fleire invitasjonar frå arrangøren Frihetsrock og blogginnlegg frå konsertgåarar.

– Musikken er ein enkel måte å treffe folk på, og knyte nye kontaktar. Det er ein stad der dei kan rekruttere folk, uttaler han til Sveriges Radio.

Ifølgje Lagerlöf blir konsertane brukt som salsstad for framandfiendtleg materiale. Han meiner den høgreekstreme rørsla igjen har innsett krafta som ligg i musikken for å lokke til seg folk.

Større resonans i befolkninga

– Ja, vi ser same tendensen i Noreg, bekreftar Shoaib Sultan, rådgjevar med fokus på ekstremisme i Antirasistisk Senter, til NRK.

– Det dreier seg om ei ny høgreekstremistisk rørsle. Men akkurat som tidlegare, så ser vi at miljøa i Sverige er større, betre organisert og gjennomgåande meir profesjonelle, seier Sultan.

– Korleis vil du karakterisere dei norske miljøa?

– Dei er små og fragmenterte. I forhold til tidlegare høgreekstreme grupperingar har dei mykje større resonans i befolkninga. Likevel har vi ikkje sett den heilt store masseorganiseringa. Dei har ikkje heilt klart å få det til, seier Sultan.

LES: Ekstremister lukes ut av Wikipedia

Fleire menn i dress

I fleire år har «kvit maktmusikk», musikk som spreier ein raseideologisk bodskap, vore i tilbakegang. «White Power» kom først til Noreg i 1994.

– Musikken og konsertane skaper eit samhald og fellesskap. I tillegg så hjelper det dei med å få eit større nedslagsfelt enn det dei elles ville fått med sin reint politiske bodskap, seier Shoaib Sultan.

Han ser fleire likskapar mellom «kvit makt»-rørsla og høgreekstremismen på 80- og 90-talet.

– Vi ser igjen den typiske høgreekstremisten, men vi finn fleire med betre utdanning, som framstår vellukka og i meir strigla form. Vi finn fleire menn i dress no enn før, seier han.

– Desverre så handlar mykje av forskjellen på gruppene frå 90-talet og gruppene i dag berre om innpakning og retorikk. Veldig mykje går på kven som snakkar, måten å snakke på, korleis dei ser ut og at dei rett og slett er meir stovereine, seier Sultan.

LES: Nytt nettsted om radikalisering

Nasjonalistiske band

På nettstaden til arrangøren Frihetsrock kan ein lese om nasjonalistiske band.

«Vi vill att frihetsrocken återigen skall växa och det är på god väg. Vi märker att intresset finns!» skriv arrangøren, som i løpet av det siste året har stått bak fleire konsertar i Jönköping.

Den siste veka har svensk media meldt om fleire samanstøt mellom konsertgåarar og medlemer av den antifascistiske rørsla AFA. Mellom anna fekk ein 20 år gammal mann, som deltok på konserten i Jönköping, ei røykbombe kasta inn i bustaden sin.

David Lagerlöf fordømmar angrepa frå AFA, men meiner det er svært bekymringsfullt at «kvit kamp»-rørsla no held på å vekse seg større.

LES OGSÅ:

• Det mørke nettet
• Skriver om høyreekstremisme i Norge

Norsk gruppe deltar på treff i Stockholm

– Når det gjeld den raseideologiske rørsla, så handlar det om personar som vil skape eit etnisk reint Sverige. Om det er formålet med desse konsertane, i og med at dei sel det materialet dei gjer, så ser eg ingenting positivt i dette, seier Lagerlöf.

Shoaib Sultan bekreftar at det er mykje kontakt mellom dei svenske og norske miljøa.

Les meir: Antirasistisk Senter sin rapport om høgreerstremisme i Noreg.

–Det har vi sett heilt sidan 80- og 90-talet. Det skal vere ei større samling av kontrajihadistiske rørsler i Stockholm 4. august, der vi forventar at også ei større gruppe frå Noreg skal delta.

HØYR RADIOSAK OM WHITE POWER-MUSIKK: