– Mitt Romney burde vera henrykt over den nye Batmanfilmen, meiner kommentator.

Foto: DOMINICK REUTER/Reuters

Batman-filmen The Dark Knight Rises går for tida sin sigersgang på kinoar verda over. Dette er den tredje filmen i Batman-trilogien signert regissør Christopher Nolan.

– Filmen avslører Batmans konservative sjel, meiner Robert Colvile, kommentator i The Telegraph.

Han er ein av ei rekke kommentatorar som peikar på konservative trekk ved Batman.

– Batman, super-milliardær som har arva formuen sin, kjempar mot skurken Bane og dei anarkistiske massane. Mitt Romney burde vera henført, skriv Catherine Shoard i The Guardan.

Samanliknar mobb med Occupy-bevegelsen

I The Dark Knight Rises kjempar Batman mot skurken Bane, som utnyttar fattigfolks misnøye for å skapa ein fillete kledd og livsfarleg undergrunnshær.

Fleire kommentatorar peiker på likskapstrekk mellom mobben til Bane og den internasjonale Occypy-bevegelsen som krev kontroll over den globale kapitalismen og som hevdar dei representerer 99 prosent av folket.

Skurken Bane går berserk på børsen i Gotham. Hans populistiske frieri til dei fattige kan bli sett på som kritikk av Occupy-bevegelsen.

Foto: Ron Phillips

– Det er umogeleg å ikkje kjenna Nolans avsky mot Occupy Wall Street, skriv filmkritikaren Christian Toto på den konservative nettstaden Breitbart.

– Opprøret Bane inspirerer til er i praksis «Occupy Gotham City», om dei 99 prosentane hadde brukt våpen i staden for megafonar, skriv Robert Colvile i The Telegraph.

«Reaksjonær film»

Catwoman, spela av Anne Hathaway, foraktar dei rike og åtvarar Batman mot ein komande revolusjon. Hennar kritikk av kapitalismen er ok, så lenge den ikkje fører til politiske endringar, skriv Mark Fisher i den sørafrikanske avisa Mail & Guardian.

– The Dark Knight Rises viser at konkret handling mot dei rike, eller revolusjonære tiltak for å redistribuera eigedom, fører til eit dystopisk mareritt, skriv Fisher, som meiner at filmen har eit reaksjonært syn på politikk.

Batman er Bruce Wayne på dagtid, ein vellukka forretningsmann og filantrop. Mark Fisher meiner at den priviligerte Bruce Wayne skal bevise at det finst gode menneske som er rike, og at dei kan redda verda frå dei verste sidene til kapitalismen.

– Filmen demoniserer kollektiv handling mot kapitalen, medan den ber oss om å stola på ein neddempa riking, skriv Fisher.

Glenn Beck vil ha honorar

Filmen er også blitt omfamna av den ytste høgrefløya i USA.

– Eg skulle hatt royalties. Alt eg har sagt dei siste tre åra, skjer i denne filmen, seier den høgrekonservative kommentatoren Glenn Beck på sin eigen TV-kanal GBTV.

God kjemi mellom Bruce Wayne (Christian Bale) og Selina (Anne Hathaway). Selina er Catwoman, og får lov til å koma med neddempa kritikk av kapitalismen, meiner kommentator.

Foto: Ron Phillips

Beck meiner Batman forsvarer landet mot inntrengarar, som superskurken Bane.

– Bane er ikkje for Gotham, han er ikkje for Amerika. Han held ein tale der han seier at han skal frigjera folket, og peikar på fengselet som staden der folket blir undertrykt. Det er jo som når folk snakkar om Guantanomo, seier Glenn Beck.

Også den konservative radioverten Rush Limbaugh meiner Batman liknar på Mitt Romney. Han har tidlegare kritisert filmen for å svartmåla Mitt Romney, ved at namnet på skurken Bane liknar namnet på eit av selskapa til Romney.

Les meir: Kobler Romney og Batman-skurk

Nolan inspirert av historie

Regissør Christopher Nolan hevdar på si side at The Dark Knight Rises ikkje er politisk i det heile tatt. Til Rolling Stone seier han at målet er å visa korleis konfliktar i samfunnet kan bli utnytta av personar med vonde hensikter, som skurken Bane.

– Bane kjem og snur opp ned på verda vår. Det har skjedd i ulike samfunn opp gjennom historia, så kvifor ikkje her, kvifor ikkje i Gotham? seier Nolan.

På spørsmål frå magasinet om Bruce Wayne ville ha stemt på Mitt Romney svarar Nolan:

– Før eller etter Bruce blir blakk?

Sjå Filmpolitiets anmeldelse av filmen her: