Det var i slutten av september at ein mann i 50-åra vart funnen død i si eiga leilegheit på Kopperud i Gjøvik. Politiet slo raskt fast at mannen hadde vore utsett for noko kriminelt, og etter kvart vart fire personar sikta i saka.
Tre av desse vart varetektsfengsla i fire veker, medan fjerdemann gjekk fri. Nå er ytterlegare ein av dei sikta slept fri, slik at det er to som sit fengsla.
Utfordrande etterforsking
– Vi held framleis på å etterforske saka, og kan ikkje kome med noko dato på kva tid vi er ferdige, seier politiadvokat Anne Ulsrud ved Vestoppland politidistrikt.
Ho er svært forsiktig med å kommentere saka, og vil ikkje seie noko om kva dei sikta har fortalt i avhøyr. NRK veit at det har vore utfordrande for politiet å finne ut kva som eigentleg skjedde i blokka på Kopperud i forkant av drapet.
– På det stadiet vi er i etterforskinga så kan eg ikkje kommentere om nokon av dei har tilstått, seier Ulsrud.
Dei sikta i saka høyrer til eit rusmiljø.