5,2 milliardar til Bergensbanen

SV-leiar Audun Lysbakken og miljøvernminister Bård Vegard Solhjell tok natt til tysdag toget frå Oslo til Bergen. Med på turen har dei 5,2 milliardar til utbetring av Bergensbanen.

Etter natta på toget, som var kraftig forseinka, la SV representantane fram Regjeringa sine planar for Bergensbanen, på jernbanestasjonen i Bergen.

Togturen føyer seg inn i rekkja av lekkasjar frå Nasjonal transportplan, som vert lagt fram i slutten av denne veka. Frå før har Regjeringa lova ferjefri kyststamveg, ein eigen pott til kollektivtrafikk i storbyane og pengar til realisering av Stad skipstunnel.

– Denne nasjonale transportplanen som me no legg fram vil vera eit generasjonsløft for jernbane i Noreg, seier miljøvernminister Bård Vegard Solhjell frå SV.

2,4 milliardar neste fire år

2,4 milliardar skal brukast dei første fire, og mest forpliktande, åra i NTP-perioden. Pengane skal brukast på det allereie annonserte dobbeltsporet mellom Bergen og Arna, forbetringar av tilbodet mellom Bergen og Voss og oppstart av Ringeriksbanen.

– Dette er me veldig stolte av, dette betyr realisering av tre viktige prosjekt. Dette vil gje ein ny kvardag både for dei som reiser lokalt, men òg for dei som reiser mellom Bergen og Oslo, seier SV-leiar Audun Lysbakken.

Allereie i samband med statsbudsjettet løyva Regjeringa 50 millionar til oppstart av dobbeltsporet mellom Bergen og Arna. No lovar Regjeringa at det skal settast av 3,2 milliardar for å få realisert jernbanetunnellen.

Sist dei raudgrøne representantane troppa opp på jernbanestasjonen i Bergen, lova dei at dobbeltsporet skulle stå ferdig innan 2019.

Vossebanen og Ringeriksbanen

Regjeringa set i tillegg av 500 millionar i dei siste seks åra av NTP-perioden for å utbetra Vossebana mellom Bergen og Voss.

– Dette skal bety at ein får ein jamn timefrekvens mellom Bergen og Voss, seier SV-leiaren.

Det er i tillegg sett av 1,5 milliardar til oppstart av Ringeriksbanen, som skal forkorte reisetida mellom Sandvika og Hønefoss. Jernbanestrekninga, som opphavleg vart vedteke etter eit forlik mellom Arbeidarpartiet og SV i 1992, er først inne i Nasjonal transportplan dei siste seks åra av planperioden på ti år.

– På skinner igjen

– Dette betyr at Ringeriksbanen er på skinner igjen. Men dette må venta til den andre halvdelen av planperioden, seier Lysbakken.

Stortingsrepresentant Magne Rommetveit frå Arbeidarpartiet håpar på relativt snarleg byggestart.

– No vert det planlagt med dobbeltspor og høg fart. Eg håpar at ein kan starta i 2018 eller i 2019, seier Rommetveit.

Ringeriksbanen vil forkorta reisetida mellom Bergen og Oslo med om lag ein time.

– Mange må dela skulda skulda for at Ringeriksbanen ikkje kom før. Poenget no er at denne kjem på sporet att, seier Kjersti Toppe frå Senterpartiet.