– Eg er mållaus. Dette er berre heilt fantastisk!
Slik reagerte ein storfornøgd Fjell-ordførar Eli Berland fredag føremiddag, då Nasjonal Transportplan vart lagt fram av regjeringa. Der kom det fram at det er lagt av 2 milliardar kroner til Sotra-sambandet - alt i perioden 2014 - 2017.
Dermed trur Berland at Sotra-folket alt i 2020 kan få ei splitter ny bru å køyre over, noko som vil bety kortare køare for ein av dei trongaste flaskehalsane i distriktet.
– Dette er ein merkedag, ikkje berre for Fjell kommune, men for heile regionen. Ikkje minst for næringslivet vårt er dette noko vi har jobba for og kjent behovet for i årevis.
Fem milliardar gjennom bompengar
– Eg hadde faktisk ikkje tenkt på tal, vårt fokus har heile tida vore på at Sotrasambandet skulle inn i første del av NTP. Men at vi får såpass er sjølvsagt veldig kjekt, seier Eli Berland.
Prisen på prosjektet har nemleg auka, og er i dag sett til sju milliardar kroner. Dermed skal fem milliardar av den totale prislappen finansierast gjennom bompengar - noko ordføraren tar med eit smil.
Les også:
– Dette får vi til, det skal vi klara, det er eg ikkje i tvil om, avsluttar ho. Og på spørsmål om kva tid Sotrabuar kan ta i bruk ny bru, er svaret skråsikkert: I 2020.