Åtvarar mot offpiste-køyring etter stormen det siste døgnet

Det er nysnø – 30 til 40 centimeter i djupn – i kombinasjon med vind som kan føre til svært farlege forhold, fortel Kristensen.

Han er skredforskar ved Noregs Geotekniske Institutt.

– Det er ein nokså ustabil situasjon, slik forholda er no.

• Les også: No skal vi bli verdas beste på snøskredvarsling
• Les også: Alvorlig for mann (50) som ble tatt av skred

Lesider, der snøen har lagt seg ut, kan vere ein utløysande faktor.

– Der kan ein fort løyse ut flakskred, spesielt om ein ferdast der det er litt bratt, seier Kristensen til NRK.no.

Mange uheldige forhold på same tid

Langvarig frost på bar mark har ført til tele og tilfrosne elvar og bekkar oppetter fjellsidene.

Når nysnøen så legg seg oppå dette, og attpåtil blir blåst opp i skavlar, aukar faren for både snø- og isras.

Også i områda der det frå før låg snø kan rasfaren auke, meddeler skredforskaren.

– Det det ligg noko snø på førehand får ein ei omdanning av snødekket. Dette gjer det ustabilt.

– God glideflate

– I tillegg har ein funne utjamning i terrenget, som gjer at det blir veldig god glideflate for snøen oppå, slår Kristensen fast.

–Er det spesielle område eller hellingar som er ekstra farlege i noverande situasjon?

– Ja. No kjem vêret frå nordvest, så det er gjerne lesidene som ligg i nordvest vindretning ein må passe ekstra på.

– Men det er vanskeleg for meg å seie eksakt kvar hen. Det er nokså lokalt, avsluttar skredforskaren ved NGI.