Føler seg fri i Molde

– Smil. Når himmelen endeleg er skyfri, står ikkje rosene lenger på hovudet.

I ein bustad i Molde står Gilles Dossou-Gouin rakrygga og framfører eit av dei mange dikta sine. Han er akkompagnert av sangerinna Inger Johanne Brunvoll, som skapar fine tonar på pianoet.

Molde sin fyrste fribyfortfattar er no ute med eigne dikt på CD. Saman med Brunvoll øver han no til Bjørnsonfestivalen i neste veke.

Inspirerande fridom

– Eg blomstrar når eg er fri til å skrive når eg vil, kor eg vil og om dei tema eg vil, seier Dossou-Gouin der han sit i Molde.

Han tykkjer det er fantastisk å kunne uttrykke seg fritt.

Dossou-Gouin er mannen som gjekk frå tortur og fengsel i Benin i Vest-Afrika til å bli ein del av kulturlivet i Molde.

– Eg tykkjer kulturen og kulturlivet i Molde er heilt eineståande, seier ein tydeleg engasjert Dossou-Gouin.

• Les også: – Norsk språk er helt annerledes, både når det gjelder tenking og meninger

Langvarig samarbeid

Neste veke skal han opptre saman med Brunvoll på Bjørnsonfestivalen i Molde.

Men samarbeidet mellom dei to er ikkje nytt. Det har vore ein lang prosess. Omlag seks år har gått sidan samarbeidet mellom Brunvoll og Dossou-Gouin starta.

– Gilles kom hit på eit arrangement eg hadde. der spurte han om eg ville lage musikk til dikta hans, seier Brunvoll.

Moldesangerinna trengte ikkje lang tid før ho bestemmte seg.

– Eg sa sjølvsagt ja, og så fekk eg konseptet i handa.

Frå den gong har ballen rulla vidare, og den fyrste CDen til Dossou-Gouin er no klar.

• Les også: - Molde min annen hjemby

Betydningsfull ordning

Rolf Orø, festivalleiar i Bjørnsonfestivalen meiner fribyforfattarordninga har betydd mykje for Molde.

– Ordninga gjer at vi får veldig spennande personar tilgjengeleg til både det eine og det andre arrangementet, Orø.

Han meinar Dossou-Gouin er eit viktig bidrag til kulturlivet i Molde.

– Dossou-Gouin har verkeleg utvikla seg her i Molde. Han har laga fleire bøker og no ein CD. Han er ein veldig viktig person.