Søndag opplevde han det største marerittet ein fjellvandrar kan oppleve. Han var på topptur saman med Ålesund og Sunnmøre turistforening. Turen gjekk til det 1416 meter høge Jønshornet i Ørsta. Jønshornet er eit av dei høgaste fjella i området. Trond Lervik fall og sklei halve distansen ned att. I 800 meter opplevde Lervik det som om han ikkje hadde kontakt med fast grunn. I tillegg sklei han 200 meter. Til saman vart fallet på ein kilometer. Han blei skadd, men overlevde.
- Eg har gått ganske mykje i fjellet. Og eg har hatt mange flotte turar på tindane i Sunnmørsalpane. Heile familien går mykje i fjellet, fortel Trond Lervik.
•
•
Skulle vere førstemann ned
Søndag var dei på veg til Jønshornet. Dei var ei heil gruppe frå Ålesund og Sunnmøre turistforening som var på veg mot toppen. Første delen av turen gjekk på ski. Ved foten av toppen tok gruppa av skia og brukte steg-jern den siste strekninga.
- Vi sikra oss med tau på dei brattaste henga. Deretter gjekk vi vidare mot toppen. Heilt oppe på toppen bles det og det var kaldt. Eg skulle vere førstemann ned. Kanskje var eg uforsiktig.
- Eg kom litt bort frå sporet der eg hadde kome opp. Då skjedde det brått. Snøen under meg gav etter, fortel Trond Lervik.
•
•
- Alt rasa og det blei kvitt
Trond Lervik var på veg ned frå Jønshornet. Han forlet sporet han hadde laga på veg opp for å gå rundt eit gjøl.
- Eg trudde eg var langt frå toppen av sjølve skavlen. Men det kan eg umogleg ha vore. Skavlen gjekk av og eg blei ståande i lause lufta. Det var ei marerittoppleving. Eg merka at snøen gav etter.
- Eg såg ned og eg prøvde å gripe tak i snøkanten. Men taket glapp og eg forsvann ned fjellsida.
•
•
- Fall og fall
Trond Lervik fall 800 meter ned fjellsida. Dette er over halvparten av høgda på den majestetiske sunnmørstinden. Rund han vart det berre kvitt.
.- Eg kjende at eg berre fall og fall. Det var masse snø rundt meg. Eg prøvde alt eg kunne å jobbe med armane og beina. Etter kvart minka farta litt. Då trudde eg at alt hadde gått greit. Då var eg nok innom ei fjellhylle eller noko slikt.
- Men i staden fekk eg stor fart på nytt utfor eit nytt parti. Det blei mørkt ei stund. Men etter kvart lysna det og eg blei liggande i botnen av området, fortel Lervik.
•
Tenkte på dei på toppen
Då Trond Lervik stoppa, hadde han falle ein kilometer. 800 meter var så godt som fritt fall. Dei siste 200 metra hadde han sklidd ned fjellsida. Den første tanken som slo han, var at han måtte varsle dei som var att på toppen.
- Eg tenkte eg måtte ta fram mobilen og prate med dei som sto att på fjellet. Eg tenkte at dei som sto att måtte ha det svært vondt. Dei mangla jo ein mann. Eg tenkte på kva kjensler dei måtte stå der med.
- Eg prøvde å ikkje skape panikk og forklarte at det hadde gått greit med meg. Dei fekk beskjed om at dei ikkje måtte prøve å fire seg ned, men at dei istaden måtte skaffe luftambulanse.
•
Skadd i beinet
Trond Lervik skjønte straks at han trengte luftambulanse etter det voldsomme fallet. Heldigvis fekk han kontakt med resten av turfølgjet som fekk kalla helikopteret til seg.
- Eg såg jo at beinet var heilt ute av ledd. Dei på toppen fekk koordinert med luftambulansen. Eg fekk også ringt heim og forklarte kva som hadde skjedd.
•
Turen var organisert av turistforeninga
Turen til Jønshornet var organisert av Ålesund og Sunnmøre turistforening. Trond Lervik vil ikkje påstå at tryggleiken på turen var for dårleg.
- Når ein er på ein tur som dette har kvar einskild ansvar for seg sjølv. Kunnskapen som turistforeninga har med seg er veldig viktig. Her blei vi sikra veldig godt heile vegen. Vi brukte lang tid på vegen opp på toppen, for at vi ikkje skulle utsetje oss for fare. Då eg var litt rask på vegen tilbake, kan eg ikkje klandre nokon annan enn meg sjølv.
- Eg må skryte av turleiaren som viste veldig stor kunnskap om fjellet. Eg anbefalar framleis andre om å gå på turar, helst i følgje med turistforeninga. Der blir du teken vare på, seier Trond Lervik. Ein blir ikkje kvitt all risiko. Men ein kan redusere risikoen. Og ein kan gjere det som er mogleg for å kome seg trygt opp og ned, seier Trond Lervik der han ligg skadd på sjukehuset i Ålesund.