Nytt liv i gamalt hus

Det var Lars Kvernberg og Lars Torset som på tampen av 1800-talet bygde det nye kommunehuset for Aure kommune. Då det 20. århundre gjekk mot slutten, var huset i elendig forfatning.

Det var Aure kunstlag som for fleire år sidan starta å pusse opp att det falleferdige huset. Alt er gjort på dugnad blant medlemmer og vener.

Laurdag kunne kunstlaget stolt vise fram resultatet for omlag 100 frammøtte.

Ein stor dag

- Dette er ein stor dag for kunstlaget. Vi skuldar ei stor takk til alle som har stått på og aldri gitt opp håpet for å få huset i stand. For laget markerer dette ei ny tid, sa leiar Lena Bakken i Aure kunstlag, før ho klipte snora framfor inngangen.

Takknemleg politikar

Huset skal frå no av brukast både til utstillingar, kurs, møter og selskap, og som ny kulturell møteplass i bygda. Huset er flytta frå der det stod opphaveleg til sentrum, ved sida av Prestlåna.

Tidlegare kommunepolitikar Per Havnvik var tilbake og held tale ved opninga, slik han også gjorde då huset blei flytta i 2002.

- Det var modig gjort av kunstlaget å ta på seg oppgåva med å sette i stand huset. Vi politikarar blei kvitt ei plage, sa Havnvik.

Også Aure kommune var på plass under opninga. Leiar i hovudutvalet for kommuneutvikling, Olav Håkon Ulfsnes ville også gratulere:

- Eg har stor sans og respekt for måten Aure kunstlag har løyst denne oppgåva på, sa Ulfsnes.

Kunst og kafé

Laurdag opna kunstutstillinga «Vår kunst». Det er medlemmene i kunstlaget som har lånt ut bilde dei har i heimane sine til denne utstillinga. I tillegg er der ein liten kafé med fem bord. Publikum strøymde til både kunst, kaffe og kaker denne pinseaftan.