Storberget vil satse meir på fartskontrollar

I Eiksundtunnelen på Sunnmøre er det målt fart opp til 165 kilometer i timen. Dette er på den same strekninga der fem menneske miste livet i ei trafikkulukke for halvanna år sidan. Eiksundtunnelen er verdas djupaste undersjøiske tunnel. No varslar Knut Storberget meir kontrollar.

– Eg ønskjer meir fartskontrollar på norske vegar, seier Knut Storberget til NRK.

• Fotoboks hindrar ikkje grisekøyring i Eiksundtunnelen
• Fartsgalskapen held fram i dødstunnelen

Fotoboksar og gjennomsnittsmålingar

I intervju NRK har gjort med ungdom dei siste dagane, har det kome fram at dei ofte vel eit køyremønster, med stor fart for så å slakke ned der fotoboksane står. Dermed er det mange av fartssyndarane som ikkje blir tekne. Knut Storberget tek til orde for meir gjennomsnittsmålingar.

– Eg ønskjer meir kontrollar, og dette kanskje enten i form av fotoboksar eller gjennomsnittsmålingar, seier Storberget.

• Her blir han tatt 190 km/t i tunnelen
• Fartsbøller i boks

Politiet ønskjer meir gjennomsnittsmålingar

Politiet sitt senter for automatisk trafikkontroll held til i Fræna. Der er Kjell Arne Hestad leiar. Han øsnkjer også meir gjennomsnittsmåling. Slike målestrekningar fins blant anna på Dovre, i Telemark og i Østerdalen.

– Eg trur folk vil tilpasse farta over ei lengre strekning om vi innfører gjennomstnittmålingar, seier leiar for ATK-sentralen, Kjell Arne Hestad.

• Dette er fartsverstingane i fylket
• Her køyrer sørlendingane fortast

– UP skal styrkast

På besøket sitt på Sunnmøre tysdag, varsla Knut Storberget også ei styrking av Utrykningspolitiet. Meir synleg politi på vegane skal få farta ned.

– UP må styrkast og politiet må vere meir synlege på vegane, seier Storberget til NRK.

– Vanvittig fart

Den største farta som er målt i fotoboksene i Eiksundtunnelen er 165 kilometer i timen. Denne opplysninga får Knut Storberget til å reagere sterkt.

– Eg tykkjer det er vanvittig at nokon får seg til å køyre i 165 kilometer i timen i Eiksundtunnelen, seier Knut Storberget.