Vegvesenet ber måndag ettermiddag folk i Møre og Romsdal om å halde seg heime. Ver og føre kan gje vanskelege køyreforhold og vegar kan bli stengde på kort varsel.
- Folk som bur i tradisjonelt rasutsette stader bør halde seg i ro i kveld, seier avdelingsdirektør Knut Nauste.
Mange stengde vegar
Måndag ettermiddag er fleire vegar i fylket stengde på grunn av ras eller fare for ras. Det er:
- Fylkesveg 41 Bueide - Skjåstad
- Fylkesveg 41 Leira - Viddal
- Fylkesveg 43 Hunneset - Vatne
- Fylkesveg 60 Stranda ferjekai - Hellesylt
- Fylkesveg 63 Indreeide - Geiranger - nattestengd
- Fylkesveg 70 Store Standal - Festøya, ved Soljølet
- Fylkesveg 191 Eikesdalen - nattestengd
- Fylkesveg 312 - Hoven - Leangen
- Fylkesveg 314 Hafsåsen - Gjørasmoen
- Fylkesveg 651 Bjørnaset - Heidane
- Fylkesveg 655 Skylstad - Fivelstadhaugen
I tillegg melder vegvesenet at fleire vegar kan bli stengde på kort varsel. Fjord1 MRF sette måndag ettermiddag opp ferje mellom Stranda og Hellesylt, for å ta unna trafikken etter vegstenginga.
Ørskogfjellet opna igjen
Ørskogfjellet blei tidlegare i dag stengt, men etter å ha gått over området med helikoper måndag ettermiddag vurderte geologane det slik at vegen kunne opnast igjen.
- Det meste av snøen er komen ned, berre eitt laussnøområde gjenstår, så førebels opnar vi vegen, seier avdelingsdirektør Knut Nauste. Måndag kveld bestemte vegvesenet seg for å halde vegen open gjennom natta.
Les meir:
Stor skredfare
Vekslande ver gjer at det er varsla stor skredfare i Møre og Romsdal. Krister Kristensen i Norges Geotekniske Institutt seier det kan gå fleire ras i kveld og natt.
- Med all den snøen som er komen,vil det nok brake laus ein del skred, seier Kristensen. Han trur skreda kan bli store.
- Det ligg fersk snø i mange av fonnefara, og skreda vil nok dra med seg denne snøen, seier Kristensen.
Les også:
Storm i kveld
Det blir ein våt, kald og stormfull kveld i Møre og Romsdal. Ifølgje Meteorologisk institutt er det venta liten storm 22 med regn, og snø i høgda.