Oppslagsverket Allkunne sin nynorske mobilapplikasjon
Foto: Allkunne Fredag 4.mai lanserte Allkunne ein av dei første nynorske applikasjonane. Dagleg leiar Audhild Gregoriusdotter Rotevatn seier applikasjonane er viktige fordi mobil i dag står for ein stor del av nettbruken.
Satsar på mobile plattformer
– Det det svært viktig å ha nettsider tilpassa plattformene der lesarane er. I fjor lanserte Allkunne mobiltilpassa nettside, og no følgjer vi opp satsinga på mobile plattformer med applikasjonar, seier Rotevatn.
Allkunne er eit nynorsk digitalt oppslagsverk som er gratis og inneheld rundt 5000 artiklar. Oppslagsverket har hovudsakleg konsentrert seg om nynorsk kulturhistorie, men blei i 2012 eit fullverdig leksikon.
Audhild Gregoriusdotter Rotevatn i Allkunne seier det i dag fins få nynorske mobilapplikasjonar
Foto: Trond Vestre / NRK
Lite nynorske applikasjonar
– Det finst ei uendeleg rekkje mobilapplikasjonar, men enda er det lite nynorske applikasjonar på marknaden. Desse mobilapplikasjonane skal gi lesaren eit kvalitetssikra nettleksikon for handa. Det er viktig for demokratiet at det finst fleire røyster i det offentlege rommet, og Allkunne vil vere der brukarane er, seier Rotevatn.
Mobilapplikasjonane er utvikla av Avento AS i Ålesund.
