I talen til årsmøtet gjekk stortingskandidat Sveinung Rotevatn hardt ut mot den raudgrøne regjeringa. Han var klar på at Venstre går for regjeringsskifte.
– Den raudgrøne regjeringa har leia oss gjennom åtte tapte år for høgare utdanning og forsking, åtte tapte år for modernisering av offentleg sektor og åtte tapte år for å skape framtidas grøne energinæring, sa Rotevatn.
Vil i regjering
Rotevatn skulda dei raudgrøne regjeringspartia for å ha store pengar, men små tankar då han opna Sogn og Fjordane Venstre sitt fylkesårsmøte på Skei hotell.
Om partiet går til val på regjeringsskifte, sa Rotevatn at det ikkje er gitt korleis ei framtidig borgarleg regjering vil sjå ut.
– Men det er ein enorm skilnad på om det komande regjeringsskiftet vert mørkeblått, eller om det vert blågrønt, sa han.
Viktige valkampsaker
I talen framheva stortingskandidaten særskilt behovet for meir kunnskap i skulen, ein liberal næringspolitikk og ein ambisiøs klimapolitikk som viktige valkampsaker for partiet.
– Vårt fokus i skulepolitikk er kvalitet, kvalitet, kvalitet. Difor går vi til val på eit lærarløft, der vi mellom anna vil gjere om lærarutdanninga til ei mastergrad, sa Rotevatn og avslutta:
– Fylket vårt treng nye krefter på Stortinget, og landet vårt treng nye krefter i regjeringskontora. Det er langt fram, og vi har frykteleg dårleg tid.