– Sikta er altfor dårleg for at helikopteret kan lette. Difor har eg sett meg i bilen og er på veg til Aven, seier Tveit til NRK.no.
Seint måndag kveld gjekk det eit stort steinras ved Avenbukta på E39 mellom Lavik og Vadheim. Raset skal vere på over 100 meter i breidde, og vegen har vore stengt sidan.
Einaste omkøyringsmoglegheit er fylkesveg 57 via Dale i Fjaler kommune, ein omveg som fort tek ein time og vel så det.
- LES OGSÅ:
Håpar helikopteret kjem seg av gårde
Tveit er framme ved Aven, men kan ikkje seie noko om han kan vurdere rasstaden heilskapleg utan helikopter.
– Eg kan ikkje seie noko om dette då eg ikkje har vore på staden. Men lettar tåka, så kjem helikopteret utover til oss, og då kjem vi oss opp. Men dette må vi berre sjå, seier Tveit.
Han tek sikte på å først vurdere raset frå bakkenivå.
- LES OGSÅ:
Håpar på vindauge
Pilot Øyvind Myhre i Airlift seier til NRK.no i 08-tida at han håpar på eit vindauge slik at det let seg gjere å lette i løpet av ein halv til ein time.
– Vi ser på prognosane at det vil lette litt rundt 08.30 og ei stund framover. Men så kjem det ein del bygeaktivitet. Kanskje klarar vi å snike oss ut mellom bygene, seier Myhre.
Han er avhengig av fri sikt for å kunne lette, og tek ingen sjansar før tilhøva tilseier at det er trygt.
– Men fronten som er over oss no er truleg forbi på ein god halvtime. Dei eg har snakka med i Lavikområdet fortel at vêret er noko lettare der, seier Myhre.
Etter planen skal han plukke opp geolog Tveit ved Aven og fly han opp til synfaring i fjellsida.