Det var ei laurdagsnatt i februar 2004 at overgrepet skal ha skjedd i ei kjellarstove i Sunnfjord. Ein 19 år gammal gut hadde ingen stad å sove etter å ha vore på fest. Han vart tilbydd ein plass på sofaen hos mannen i 50-åra som no sit på tiltalebenken i Fjordane Tingrett.
19-åringen forklarte i retten at han sovna på sofaen, men vakna av at den tiltalte mannen i 50-åra hadde oralsex med han.
Brukte ni månader
Saka vart kjapt meldt til politiet, men deretter gjekk det seint. Heile ni månadar gjekk før politiet avhøyrde den tiltalte. I retten fredag forklarte ein lokal lensmannsbetjent at årsaka var at drapet på Anne Slåtten sommaren 2004 hadde teke mesteparten av ressursane, i tillegg til at den tiltalte hadde unnlete å møte opp sju-åtte gongar på rad.
- Vil ta det ille opp
Ifølgje aktor Knut Broberg ville ei straff på 10-12 månader vore normalt i ei slik sak. Men han meiner det er formildande at det har gått så lang tid sidan overgrepet skjedde. Difor kravde han berre 10 månader fengsel då saka vart avslutta i Fjordane Tingrett fredag ettermiddag.
- Det har gått lang tid i denne saka, og det vil vere eit av momenta som retten truleg må leggje vekt på. Det er beklageleg at etterforskinga har teke så lang tid.
- Kravde full frifinning
Forsvararen til den tiltalte, Ivar Blikra, hevda på si side at klienten hans måtte frifinnast, då han i retten sa at dei to hadde hatt frivillig sex.
Louis Anda som er bistandsadvokat for den fornærma, seier 19-åringen vil ta det ille opp om sein saksbehandlingstid hos politiet fører til mildare straff.