– SFJ Kunstmuseum må ta skulda

Etter at Sogn og Fjordane Kunstmuseum tok over drifta på Astruptunet har talet på besøkande ved tunet gått ned.

No meiner Hamar kommunen gjer rett i å vurdere om tunet skal gå tilbake til kommunal drift.

– Sogn og Fjordane Kunstmuseum burde skjønne at det er éin juvel innanfor dette systemet, og det er Astruptunet, som har både nasjonal og internasjonal interesse, seier politikaren.

Negativ utvikling

Det siste året kommunen sat med ansvaret for Astruptunet, hadde ein mellom 6.000 og 7.000 besøkande.

I 2004 tok Sogn og Fjordane Kunstmuseum over drifta.

Då såg ein føre seg ein auke, men i fjor var talet på besøkande nede i 5.500. Utviklinga på landsbasis er stikk motsett, der besøkstala aukar for kvart år som går.

Ikkje godt nok

Atle Hamar miener museumsreforma som plasserte Jølster under Sogn og Fjordane Kunstmuseum, er grunnen til nedgongen.

– Det blir ikkje lagt nok arbeid i å utvikle utstillingane på Astruptunet, slik at ein held ved like den nasjonale og internasjonale interessen, seier han.

I tillegg finn Venstre-politikaren noko å utsetje på marknadsføringa.

– Det er ikkje totalt sett god nok marknadsføring av Sogn og Fjordane Kunstmuseum, konstaterer han.

Ressursar

Morten Johan Svendsen, som er museumsdirektør i Sogn og Fjordane Kunstmuseum, understreker at Astruptunet er det museet i fylket dei bruker mest ressursar på, og at det med tanke på ivaretaking av tunet ikkje kan vere for mange besøkande der.

Men han er samd med Hamar i at dei kunne marknadsført betre.

– Vi har eit budsjett som vi må halde oss til, og som det har vore semje om i styret, men vi har ikkje hatt den utviklinga etter samanslåinga som vi håpa og forventa å sjå, fortel han.