I haust er det berre registrert 18 studentar til heiltidsstudiet. Berre for nokre år sidan var det 120 studentar på heiltidstudiet.
- Eg har ikkje full oversikt, men det er truleg det lågaste kullet vi har hatt til oppstart. Det seier noko om dramatikken i situasjonen, seier dekan Rasmus Stokke ved .
Færre kvalifiserte
Fylkesleiar i Utdanningsforbundet, Gunn Marit Haugsbø, er uroa. For undersøkelse gjort av KS viser ein stadig aldrande lærarstamme i skulen.
- Vi veit at det er mange godt vaksne lærarar i skulen som vil gå av med pensjonen innan få år. Dermed kan det bli fleire ukvalifiserte lærarar i skulen og det vil gå utover elevane, seier ho.
Treng betre omdøme
Både Stokke og Haugsbø meiner betre status for læraryrket og betre arbeidsvilkår er nøkkelen for å få utdanna fleire lærarar.
- Det aller viktigaste er at den omtalen som er av lærarane og skule må bli meir positiv. Eg kan skjøne at det ikkje er freistande for ungdom å starte på lærarutdanninga med den elendige skildringa av yrket, seier Stokke.
KS tek sjølvkritikk
KS har på si side starta sin eigen rekrutteringsstrategi for å få fleire til å velge lærarhøgskulen. Men Astrid Paulsen, rådgjevar i KS Sogn og Fjordane, vedgår at dei har gjort ein for dårleg jobb på området.
- Det viktigaste er å få sett ting i samanheng. Det kan vere stipendordningar, utdanning med jobbgaranti etter prøvetid eller desentralisert vidareutdanning på deltid for dei i skulen som ikkje er kvalifisert i dag, seier ho.