Det var i to-tida på natta den 2. mai at 48-åringen hamna i eit basketak med to andre menn. Episoden skjedde like utanfor Hafslo pub og pizzeria. Gjester på utestaden greip inn og fekk stoppa slåstkampen. Like etter segna 48-åringen om. Ambulansepersonell kom til staden, men livet stod ikkje til å redde.
Sikta for lekamsfornærming
Lensmann i Luster, Asle Karoliussen, fortel at to menn er sikta for lekamsfornærming.
- 48-åringen segna om like etter at ein slåstliknande situasjon med to andre menn var over.
-Så de ser ein samanheng mellom slagsmålet og dødsfallet?
-Vi etterforskar forholdet som eit mistenkjeleg dødsfall og ønskjer å få mest mogeleg informasjon om konflikten som var i forkant av dødsfallet. På laurdag ettermiddag pågreip vi to personar i samband med slåstinga utanfor puben. Begge er sikta for lekamsfornærming. I tillegg har vi avhøyrt 17 vitne, seier Karoliussen.
Hjartestans
Lensmannen fortel vidare at 48-åringen truleg døydde av hjartestans.
-Den førebelse obduksjonsrapporten tyder på at mannen døydde av hjartestans. Om slåstkampen i forkant har hatt innverknad for hjartestansen, håper vi å finne ut av gjennom vidare etterforsking og den endelege obduksjonsrapporten, seier Karoliussen. Dei to sikta mennene er 18 og 29 år gamle.