Knut Rune «Pippen» Tveiten køyrer ein doning som ikkje liknar noko anna du har sett på vegane: Ein rød tohjulstraktor slepande på ei brakke, mest liknande på ei campingvogn - men ganske så heimelaga.
Her har han med seg alt han treng, og slik skal han køyre heile Norge på langs - frå Lindesnes til Nordkapp!
Andregir og 3 km/t
- Ein må ha tolmod - det er det viktigaste. Og så må ein ha evna til ikkje å måtte planleggje alt, for det blir aldri heilt slik ein hadde tenkt. Eg har lært å ta ting på sparket, og eg legg opp ruta etterkvart, seier Tveiten.
Inni husvogna har han seng, vedovn og vaskeservant.
Torsdag hadde han vore på reise i tolv dagar, og turen hadde komme til Gaularfjellet i Sogn og Fjordane.
- Eg skal prøve å køyre frå null til 1000 meter over havet. Det blir vel ein seanse i andregir og tre kilometer i timen tenkjer eg....
Seks-sju timar på fjellet
Tveiten har nyleg lagt bak seg Vikafjellet, og veit kva han snakkar om.
Tohjulstraktoren måtte ha seks-sju timar for å leggje fjellovergangen bak seg.
- Folk kan tru eg er galen, seier «Pippen» og ler.
Blir invitert på dusj og middag
Han har teke permisjon frå jobben som møbelsnekkar og kyrkjetenar i Vinje kyrkje i tolv månader.
Målet er å fullføre turen på den vesle traktoren i løpet av eit halvt år.
- Er eg heldig, blir eg invitert inn til nokon og får meg ein dusj innimellom. Ein veit aldri, seier Tveiten.
- Eg har opplevd alt mogleg, både å få dusje og ete middag, legg han til.