Knut Helge Sandvik i Høyanger Dykkarklubb dykka ved kommunekaia i Høyanger då han oppdaga flaskene. Han trur nokon fekk det travelt då Tollvesenet var på veg.
– Eg dykka på rundt 30 meter då eg oppdaga ein stor, blå søppelsekk. Eg tok med meg 13 flasker, meir klarte eg ikkje å få med meg.
Dumpa eller mista
Kor mykje som ligg att utanfor kommunekaia i Høyanger kan ikkje Knut Helge Sandvik gjette på. Men han har ein teori om kvar dei stammer frå.
– Det stod noko med Russland på undersida, så det kan ha vore tollarar i nærleiken slik at dei har dumpa dei. Eller dei kan ha mista flaskene medan dei dreiv på med noko.
Trur marknaden dunsta vekk
Flaskene er levert til lensmann i Høyanger, Olav Hellebø. Sist han fekk russisk smuglarsprit på pulten var i 2005. Deretter tok det brått slutt, og lensmannen trur det heng saman med at Høyanger fekk eige Vinmonopol.
– Det fanns ein marknad for slikt, på den tida var det ikkje pol i Høyanger. Eg trur kanskje at marknaden har dunsta vekk litt etter at polet kom.
– Dette bør ikkje drikkast
Kva som vil skje med flaskene som framleis ligg på havbotnen skal lensmannen vurdere. I mellomtida vil Knut Helge ikkje råde folk til skunde seg ned før lensmannen har bestemt seg.
– Vi spretta ei flaske, men det lukta ammoniakk av det. Dei som tek seg ein fest på det, får ein dårleg dag.