Politiet gjekk i går kveld til væpna aksjon på Nordfjordeid etter at ein mann i midten av 20-åra fyrte av skot utanfor heimen midt i eit bustadfelt.
Vifta med hagle
Mannen skal også ha gått rundt i nabolaget og vifta med ei hagle. Etter det vi kjenner til skal mannen ha banka på hos naboar medan han hadde hagla i handa.
– Vi sendte ut fleire væpna polititenestemenn. Men vi kjenner ikkje til at han skal ha truga nokon, seier fungerande stabsjef Stig Inge Hauge ved Sogn og Fjordane politidistrikt til NRK.no.
I natt same huset. Då dei kontakta mannen på telefon, fortalte han at det berre var skot spelt av frå nettstaden Youtube. Politiet trudde han og valde å ikkje rykke ut.
Måtte bryte seg inn
Men då naboar høyrde nye smell søndag kveld og observerte mannen med ei hagle i handa, valde politiet å rykke ut. I 23-tida pågreip politiet mannen i heimen hans. Vitner på staden fortel til NRK.no at politiet måtte bryte seg inn i huset for å få kontroll på han.
– Vi har pågripe ein mann i midten av 20-åra. Mannen skal ikkje ha fyrt av skot mot personar eller gjenstander, men opp i lufta, seier politiadvokat Knut Broberg.
Mannen er no satt i arrest på Eid lensmannskontor, og ifølgje Broberg vil politiet i morgon vurdere om dei skal framstille mannen for varetektsfengsling. Mannen er ein kjenning av politiet, og han skal ikkje vere registrert med våpen.