Det er mindre bråk på byen enn før, og valdsepisodane har blitt langt mindre alvorlege enn for berre få år sidan.
- Sjå statistikk over ordensforstyrringar heilt nederst i saka
– Før i tida var det fleire slåsskampar kvar einaste helg, med brekte naser og blod. No kan det gå fleire månader mellom kvar gong det oppstår bråk, seier barsjef Fred Reiersen ved Sunnfjord Hotell i Førde.
Mindre bråk i jula
Vi er no midt oppe i julebordssesongen og det er ekstra mykje folk ute på byen. Men november og desember er det mindre bråk og vald enn elles. Det syner tal som NRK.no har fått tilgang til.
I november i år rykte politiet her i fylket ut på 82 ordensforstyrringar, medan talet i mai var heile 148. I mai 2008 måtte politiet rydde opp over 170 gonger.
Høyr radiosak her:
– Vi har ikkje hatt fleire oppdrag sjølv om folk gjerne trur at førjulstida er ekstra travel for oss i politiet. Folk tenker konsekvensar for eigne handlingar og oppfører seg fint, noko vi er veldig glade for, seier lensmann Jan-Thore Thue ved Sogndal lensmannskontor.
Lensmannen, som har over 30 års erfaring frå politiet, seier utviklinga har gått i positiv retning. I 2007 hadde politiet i Sogndal 36 valdsepisodar. Hittil i 2010 ligg talet valdshandlingar på 15.
(Artikkelen held fram under biletet)
Pratar folk til fornuft
Kvar einaste helg gjer fire ordensvakter på Træskeverket i Førde seg klare til jobb i 22-tida. Dei er utstyrte med knivsikker vest og sambandsutstyr for å vere på det sikre sida. Men stort sett får dei ikkje bruk for dette utstyret.
– Det går veldig stille og roleg for seg, men det er uansett best å vere på den sikre sida om ting skulle skje. Vi har situasjonar av og til, men vi klarar som regel å prate folk til fornuft, seier ordensvakt Stig Hårklau.
- LES OGSÅ:
– Folk er gjerne meir fulle i førjulstida enn elles. Dei drikk fortare og meir, og reiser ut på byen mykje tidlegare enn på andre tider av året. Men det blir ikkje meir bråk av den grunn, berre meir fyll, seier ordensvakt Kim Andrè Blikås.
– Før i tida gjekk det heftig for seg
NRK.no har snakka med ei rekkje utestader i fylket, og alle opplever at utelivsbransjen har endra seg markant dei siste åra.
Dagleg leiar ved Hjørnevikbua i Florø, Kåre Hukset, har arbeidd i bransjen i over 20 år, og seier utviklinga har vore enorm.
– No opplever vi bråk berre ein eller to gonger i månaden, og det jamt over heile året. Då eg starta i bransjen var det slåssing heile tida. På den tida gjekk det ganske heftig for seg, seier Hukset.
På utestaden Jibben i Måløy har også valdsbruken gått kraftig ned dei siste åra, og ved Lægreid Hotell i Sogndal fortel dagleg leiar Atle Lægreid om nye tider; bråkmakarane har begynt å oppføre seg.
(Artikkelen held fram under biletet)
Truga dørvakt med kniv
Lensmann Jan-Thore Thue peikar på fleire ulike årsaker til nedgangen i bråk.
Han vil òg rose utelivsbransjen sjølv for å tak i problema.
– Det har over tid vore arbeidd godt i utelivsbransjen for å førebygge vald, og ordensvaktene som jobbar ved utestadane gjer ein god jobb, seier Thue.
I tillegg er nattuglene er tilstades, og politiet patruljerer meir enn før, ifølgje lensmannen.
Politiet i Florø hadde problem med mykje vald og bråk for nokre år sidan, og måtte mellom anna stille opp med nærare ti politibetjentar fordi dørvaktene ved ein utestad hadde blitt truga med kniv.
Men valdsbruken har også gått ned i kystbyen dei siste åra, opplyser politistasjonssjef Robert Veset ved Flora politistasjon.
– Det er ikkje tøft å slåss lenger
Barsjef Fred Reiersen ved Sunnfjord Hotell trur årsaka til færre hendingar kan ligge i mindre gamal ukultur.
– Folk synst ikkje det er så veldig tøft at folk slåss lenger. Slik var det før i tida då bondekulturen var større. Då skulle folk tøffe seg, men slik er det ikkje lenger, seier Reiersen til NRK.no.
- LES OGSÅ:
(Artikkelen held fram under biletet)
Tal frå Sogn og Fjordane politidistrikt syner at det er mindre bråk og vald i november- og desember-månadane enn gjennomsnittet:
* Talet er per 20. desember 2010
Tala er henta frå Politiets operasjonslogg (PO) som er oppdragssystemet til politiet, og omtaler ikkje talet på straffesaker.
Statistikken omfattar valdsepisodar, og ro- og ordensforstyrringar, som politiet har vore involverte i. Den omfattar også saker i private heimar og familievald.