– Det var ei fantastisk oppleving. Så det gjekk nok ei god stund før eg fekk roa meg ned att, ler Gunnar Olsmo.
Ved midnatt opna laksefisket i sju av dei 11 lakseelvene i Sogn og Fjordane – og etter berre fem minutt var den største fangsten på gang.
– Eg såg på klokka då laksen beit på. Det tok litt over 20 minutt før han låg på land, fortel Olsmo.
- Har du fått fangst første dagen av laksefisket? Send oss bilete på e-post på sf@nrk.no eller som MMS med kodeord SF til 1987.
Brukte same fluga på rekordfisk
Han fekk den best tenkjelege starten på årets laksefiske i Eidselva. På heimelaga fluge tok han ein laks på 15,5 kilo.
– Dette er ei fluge som eg har laga i mange år, og som eg har fått veldig mykje fisk på, seier Olsmo.
– Den største laksen eg har teke på fluge var på 19 kilo – og då brukte eg den same fluga som no. Det er ei god laksefluge, seier Leikanger-mannen.
– Samveret med vener er viktigast
Han har fiska i Eidselva i mange år, og hadde god tru på laksefisket allereie kvelden før sesongopninga.
– Dette er ei tidleg elv, der laksen kjem relativt tidleg inn. Det plar vere fin fisk her når det blir lovleg å fiske, og no var det fin vasstand og veldig fine forhold, seier Olsmo.
– Du gav deg raskt etter at du fekk laksen?
– Det vart jo litt feiring etterpå. Dessutan er ikkje det viktigaste å fiske vidare for å få endå meir. Langt viktigare er samveret med fiskevener, seier han.
Ved 06.40-tida fekk Christian Platou ein laks på sju kilo på fluge i Eidselva.