Fleire avlyser arrangement

I dag tidleg kom det oppmoding frå Justisdepartementet om at det vert flagga på halv stong i alle landets kommunar.

Bakgrunnen er dei tragiske hendingane i Oslo og på Utøya i Tyrifjorden i går.

• LES OGSÅ: Anders B. Breivik teken etter massedrap

Avlyser arrangement

I Stryn var det i helga planlagt «Superlaurdag» i sentrum. Der er no sambatakter og utedans lagt vekk i respekt for alle dei omkomne, skadde og pårørande.

Det har Stryn Handel bestemt, skriv Fjordingen.no.

Også dei store skytestemna i Stryn, Markane og Hellesylt er avlyst laurdag og søndag. Dei planlagde fotballkampane med Sogndal i eliteserien og Førde i 2. divisjon er dessutan utsette.

Opa kyrkje

I kyrkjene rundt om i fylket vil det søndag bli markeringar undervegs i gudstenestene.

Prost i Sunnfjord, Rigmor Frøyen seier at Førde kyrkje vi halde ope i morgon, fram til klokka 14.00.

– Då vil det vere høve til å kome og tenne lys, og sitje i kyrkja saman med andre, seier Frøyen.

• LES OGSÅ: Over 90 drepne i Oslo og på Utøya

Under gudstenestene i morgon vil det bli ei markering. Det er laga ei eiga forbøn som skal lesast opp, med omsyn til det som har skjedd i Oslo og på Utøya.

Også val av musikk og salmar vil bere preg av tragedien.

Eit prega fylket

Innbyggjarane i Sogn og Fjordane verkar, som resten av landet, svært prega av det siste døgnet sine tragiske hendingar i hovudstaden.

• LES OGSÅ: Fleire festivalar har minnemarkering
• LES OGSÅ: AUF-leiar frå Sogn og Fjordane er sakna

NRK vert fortalt at det er lite folk i gatene og at i butikkar er folk stille og lågmælte.