Politiet tok ingen sjansar då dei klokka 18.08 søndag kveld fekk melding om ein mistenkeleg pakke som låg på trappa til ei forretning i Måløy sentrum. Dei rykte ut straks og sperra av eit større område i gate 1.
– Vi kan ikkje ta nokon sjansar, sa politiet til NRK søndag kveld.
Bomberobot
Kring klokka 02.50 natt til måndag kom bombeekspertar frå Forsvaret til Måløy. Dei sende inn ein såkalla bomberobot i området.
– Dei fekk raskt avklara det ikkje dreidde seg om sprengstoff i pakken, opplyser operasjonsleiar ved Sogn og Fjordane politidistrikt Per Rimmen til NRK.
- LES OGSÅ:
Pakken vart fjerna straks etter, og politiet kunne fjerne sperringane i sentrumsområdet i Måløy.
Reagerer sterkt
Dei skal no etterforske vidare på kven det er som står bak den falske bombemeldinga.
På pakka stod det «Dette er ei bombe. Helsing .......(namnet til ein person i Måløy)». Etter det NRK Sogn og Fjordane kjenner til reagerer politiet svært sterkt på hendinga, og ber no om tips frå publikum.