E39 via Lote og Anda kan ha størst nytte for trafikantane på lang sikt, men i si tilråding vil Vegvesenet likevel flytte E39 til Stryn.
- LES OGSÅ: Vegvesenet vil ha E39 via Stryn
I det samfunnsøkonomiske reknestykket er Vegvesenet forplikta til å tenke levetid på berre 25 år for vegane, men ser ein lengre framover i tid, er det Lote-Anda som kan kome best ut. Årsaka er at den auka trafikantnytten år for år betalar ned den ekstra kostnaden.
(Artikkelen held fram under biletet)
Meiner rapporten er mangelfull
Forkjemparane for bru i midtre Nordfjord meiner det ikkje er nok å tenkje 25 år fram i tid.
– Eg ser på det som mangelfullt, for dersom ein ser 60 år fram i tid er traseen gjennom midtre Nordfjord meir lønnsamt enn indre, seier dagleg leiar Mats Andersson i selskapet Nordfjordkryssing.
Han meiner dette burde ha kome fram betre i Vegvesenet si tilråding.
Omdiskutert reknemåte
Vegvesenet vedgår at analysane deira er basert på føresetnader som kan diskuterast.
Prosjektleiar for konseptvalutgreiinga, Kjell Kvåle, seier det kan tenkast at det er det midtre alternativet som er mest lønnsamt dersom ein ser lengre fram i tid, og brukar andre reknemodellar enn i dag.
– Det midtre alternativet kunne kome best ut dersom vi la andre reknemodellar til grunn enn den vi brukar i dag, men tilrådinga om å legge E39 om Stryn kjem best ut etter dagens målemetode, seier Kvaale.
Han understrekar at Vegvesenet ikkje har gjort slike alternative utrekningar, og at det er Finansdepartementet som avgjer korleis ein skal måle samfunnsnytta i vegbygging.
Kvåle seier også at reknemodellane er omdiskuterte.
- Dette veit vi jo, at vegane varer lenger enn 25 år. Men vi forheld oss til dei reknemodellane som vi er pålagt å nytte.
Midtre med størst trafikantnytte
Statens vegvesen har gått inn for å flytte E39 til Stryn fordi det er tre minutt raskare og 2 milliardar kroner billegare.
- LES OGSÅ: Transportnæringa jublar over nye E39
Men sjølv om alternativet i Stryn kostar minst, er det ei bru mellom Lote og Anda og vidare gjennom Stigedalen som ifølgje Vegvesenet kan gi størst nytte for trafikantane samla sett, såkalla trafikantnytte.
Kan finansierast med bompengar
Mats Andersson og bruselskapet Nordfjordkryssing meiner den langsiktige samfunnsnytta er eit viktig argument for å bygge bru i midtre.
At alternativet mellom Lote og Anda også har størst trafikantnytte gjer at det i tillegg vil vere enklare å krevje inn bompengar.
Dermed tener det midtre alternativet år for år inn den ekstra kostnaden på 2 milliardar kroner samanlikna med bru og tunnel i indre Nordfjord.
- Over Lote-Anda er det eit bompengegrunnlag på ca 1,5 mrd. kroner, tar ein med Stigedalen i alternativet kan bompengegrunnlaget nærme seg 3 mrd. kroner. Ei løysing i Stryn har ca 800 millionar kroner i bompengegrunnlag. Dette tek att investeringskilnaden.
- LES OGSÅ: Debatten rasar på nettet
Stolar på Vegvesenet
Ordføraren i Stryn vil ikkje ta omsyn til dei nye opplysningane.
Han meiner ein skal halde seg til det Vegvesenet tilrår.
– Spekulasjonar og teoretiske vurderingar for framtida kjem ikkje fram i rapporten, og då kan ikkje eg halde meg til det, seier Flo.