Under hopprennet i monsterbakken i Oberstorf søndag, flaug honndølene lenger enn han har gjort nokon gong. Han er dermed høgaktuell til VM laget, som blir teke ut i morgon føremiddag.
– Anders har hatt ei kjempefin utvikling sidan han kom med i World Cupen og har kome på pallen i begge lagkonkurransane. Han har utan tvil gjort jobben sin, seier sportsjef Clas Brede Braåthen.
Sjå rekordhoppet på 216 meter her:
Fannemel gav Norge en flott start
Viktig brikke i norsk hoppsport
Sportsjefen meiner 20 åringen frå Hornindal har alle kvalitetar som skal til for å bli best i verda. Og kanskje får han vist fram styrken sin når VM blir arrangert i Vikersund 23. - 26. februar.
- Fannemel er svært ambisiøs og er dessutan fysisk sterk. Han er svært ung og lovande, eg er sikker på at vi kjem til å få sjå mykje til han i åra som kjem. Vi får sjå om det held til VM-plass, men han blir uansett ei viktig brikke i hoppsporten framover.
Har svært lyst på VM-bilett
Anders Fannemel sjølv er svært nøgd med ein 3.plass under laghoppinga søndag, og ny personleg rekord på 216 meter. Og han har sjølvsagt svært lyst på ein VM-bilett.
– Eg hadde ein ekstremt god følelse i dag og trefte bra heile vegen nedover. No blir det spennande å sjå kva som skjer i morgon.
Honndølen meiner sjølv han kan hevde seg dersom han kjem til VM, og kjenner det i magen framfor uttaket i morgon.
I alt fem løparar skal med på VM-laget og foreløpig er berre Anders Bardal klar.