Løpet i dag var det første for Bø under årets skiskyttar-VM. Under første skyting på dagens 10 kilometer starta han lovande med fullt hus på første skytinga.
Han leia løpet etter den første skytinga og låg godt an til ein topplassering. Men på andre skyting sprakk han fullstendig og måtte ut i tre strafferundar.
Då han gjekk i mål var det til ein førebels 12. plass. Men etter kvart ramla han nedover lista.
– I dag var eg dessverre ikkje god nok, seier Tarjei Bø til NRK like etter han gjekk i mål.
Trudde han hadde kontroll
Han er godt nøgd med den liggjande skytinga i dag og trudde han hadde god kontroll før den ståande.
– Det var den som øydela. Eg er ikkje nøgd med den. Eg følte at mentalt hadde eg kontrollen, men siktet låg ikkje i ro då eg skulle skyte. Då blei det vanskeleg å treffe.
Han seier det har fungert bra på trening og at han i dag er nøgd med første skyting og langrennstida. Han var 1,13 bak vinnaren og fekk den 5. beste langrennstida.
– Det gjekk betre i sporet enn det har gjort før. Eg vil takke smørjeteamet for fantastiske ski i dag.
Har tru på jaktstarten
Franskmannen Martin Fourcade vann VM-sprinten, med Emil Hegle Svendsen på 2. plassen og svenske Carl Johan Bergman på 3. plass. I morgon er det jaktstart i den tyske VM-byen.
– Eg har teke inn større differansar før. Eg føler at to av tre ting er på plass, det som manglar er den ståande skytinga, seier Bø.
SJÅ VIDEO: Tarjei Bø måtte ut i tre strafferundar etter andre skyting. Den første gjekk betre. Då blei det fullt hus.