Skiløpar låg ein time i bresprekk

30-åringen vart i ettermiddag frakta til Haukeland universitetssjukehus med luftambulanse.

Ulukka skjedde i eit område Stryn sommarski seier dei hadde sperra av og åtvara folk mot å køyre i. Den svenske skiløparen skal ha ignorert sperringane.

– Han har gjort noko rart som folk vanlegvis ikkje gjer. Ein skal ikkje gå forbi sperringar, i alle fall om ein ikkje er kjente. Det er ikkje lurt, seier assisterande driftsleiar i Stryn Sommarskisenter, Truls Omtvedt.

Det var fleire vitne til hendinga. Skipatruljen var på plass berre minutt etter fallet.

Brotskadar

– Skiløparen er ukjend i området. Han har eit ope brot i armen og kanskje ribbeins- og hofteskadar, seier Omtvedt.

Omtvedt fortel at dei hadde god kontakt med vedkomande under redningsaksjonen.

– Dei som var til stades hjelpte til i redningsaksjonen, og ambulansen var raskt på plass. Vi har ein svært kvalifisert skipatrulje, og dei har gjort ein veldig bra jobb, seier han.

(Artikkelen held fram under biletet)

Låg ein time i bresprekken

– Mannen hamna i ein tre til fire meter djup bresprekk med ei elv i botnen av den. Det blei slått full alarm, seier operasjonsleiar i Politiet, Venke Hope.

Litt etter klokka 13.13 fekk Hope melding om at mannen var henta opp frå bresprekken.

– Dei som var der saman med han klarte å få han opp på kanten. Han er no henta ut av området av luftambulansen, seier Hope.

Politiet har førebels ikkje fått snakka med dei involverte om detaljar rundt hendinga.