Politikar Jacob Nødseth (24) har siste tida sett sinna i kok hos partifeller i Høgre. Den lokale striden kring høgrepolitikaren har også gått heilt til topps sentralt i Høgre.
No sit han og rådgjevaren hans, Jon Bolstad, i møte med partileiinga i Sogn og Fjordane Høgre. Bolstad har tidlegare fått massiv kritikk for hans leiarstil.
Må trekkje uttalar
Det som starta som ein personalkonflikt mellom leiar i Unge Høgre, Embla Belsvik, og Nødseth blir berre meir og meir tilspissa. Nyleg heldt Nødseth ein privat pressekonferanse der han signaliserte mistillit mot enkelte partifeller. Han fekk også sparken som ordførar Bengt Solheim-Olsen sin politiske rådgjevar.
Generalsekretær i Høgre, Lars Arne Ryssdal, reagerer sterkt og kravde overfor Firda at Nødseth trekkjer attende utsegnene eller trekkjer seg frå partiet.
Dette før han hadde fått snakka med politikaren sjølv. Han hadde lagt att melding på mobilsvaret til Nødseth.
Svertekampanje
24-åringen frå Flora har også fått støtte frå partifeller både i Florø og Førde. Hilmar Eliasson i Flora Høgre meiner Nødseth blir utsett for ein svertekampanje.
Høgre-veteran Eva Marie Halvorsen i Førde tek også avstand frå Ryssdal si involvering i saka. Ho vurderer no å melde seg ut av partiet.
– Det går ikkje an å opptre på denne måten, og på ein måte kontakte media også før ein også har kontakta Nødseth. Eg er rysta. Det er klart at Nødseth sikkert har sagt og gjort ting som ikkje er optimalt, men slik er det i politikken, seier ho og avsluttar.
– Dette er god gammaldags stalinisme med sentralstyring. Her må vi love kva vi skal meine og kva vi skal seie til dei tillitsvalde eller andre i partiet. Det har eg aldri opplevd før. Og eg vil heller ikkje vere med i eit parti som krev dette, meiner Høgre-veteran Eva Marie Halvorsen.
