Sparebanken Sogn og Fjordane

Førde Sparebank

Gamlebanken i Førde - bygt i 1902.

I 1842 vart Førde Sparebank skipa som den andre i Sogn og Fjordane. Sogndal hadde fått sin året før. Banken heldt dei første 50 åra til i Tingstova i Sjøahola - den same tingstova som i 1857 var møteplass då fylkestinget vedtok å skipe Fylkesbaatane. Ny bankbygning stod ferdig ved Kyrkjevegen i 1902. Den husa også kommuneadministrasjon og telefonstasjon.

I 1964 vart det gamle apoteket ”Pontoppidan” ved Langebrua rive for å gje plass til nytt bankbygg, som i sin tur i 1990 vart rive for å gje plass til dagens bankbygg.

Sunnfjord Sparebank

Anders Sølvberg.

I 1973 vart Sunnfjord Sparebank skipa ved at Førde slo seg saman med Askvoll, Vevring og Jølster. I 1974 vart Anders Sølvberg tilsett som adm. banksjef, ei stilling han hadde fram til 2001. Under hans leiing gjekk stadig fleire små sparebankar inn i Sunnfjord Sparebank. Med Sunnfjord Sparebank som tyngdepunkt, vart så Sparebanken Sogn og Fjordane skipa i 1988.

Sparebanken Sogn og Fjordane

Arvid Andenæs er adm. banksjef i Sparebanken Sogn og Fjordane.

hadde ved årsskiftet 2000/2001 ein forvaltningskapital på 9 milliardar kroner. Arvid Andenæs overtok som administrerande banksjef etter Anders Sølvberg.

Samanslåing i Flora-Bremanger

Etter krise i oppdrettsnæringa fekk Sparebanken Flora-Bremanger store tap og økonomiske vanskar og vart slegen saman med Sparebanken Sogn og Fjordane hausten 2003. Banken hadde i 2003 ein forvaltningskapital på 13 milliardar kroner.

Banksamarbeid med Gjensidige?

I 2006 gjorde Sparebanken Sogn og Fjordane ein avtale med Gjensidige Holding om å skipe ein ”nettbasert” bank i Førde: Gjensidige Bank.

Avdelingskontora

Sparebanken Sogn og Fjordane har i år 2003 kontor i 20 kommunar i fylket (avdelingskontor/filialar i parentes):

Askvoll (Askvoll, Bulandet, Værlandet)
Balestrand (Balestrand)
Bremanger (Kalvåg, Bremanger, Svelgen)
Eid (Nordfjordeid)
Førde (hovudkontor og filial på sentralsjukehuset)
Flora (Florø, Eikefjord)
Gaular (Sande, Bygstad, Viksdalen)
Gloppen (Sandane, Byrkjelo, Hyen)
Gulen (Eivindvik, Brekke, Byrknesøy)
Hornindal (Grodås)
Hyllestad (Leirvik)
Høyanger (Høyanger, Lavik, Bjordal)
Jølster (Skei, Vassenden)
Leikanger ( Hermansverk)
Naustdal (Naustdal)
Sogndal (Sogndal)
Solund (Hardbakke)
Stryn (Stryn, Olden, Innvik)
Vik (Feios, Fresvik)
Vågsøy (Måløy)

I 2006 opna Sparebanken Sogn og Fjordane den første filialen sin utanfor fylket i Bergen.

Sparebanken Sogn og Fjordane ligg like ved Jølstra på tomta der gamleapoteket sto. (Foto: Arild Nybø, NRK)