Ulukker i Jølster

1689

I 1689 omkom ei kvinne frå garden Strand av skadene ho fekk då garden vart råka av snøskred fire dagar før ho døydde. Samstundes omkom ein soldat som budde på garden Dvergsdal, der fem hus vart øydelagde av snøras.

1822

I 1822 drukna dei to døtrene til Førde-presten Søren Hjelm Friis og skyssguten ved garden Flaten i nedre Jølster. Dei to jentene på 14 og 11 år var på veg heim etter eit besøk i prestegarden på Ålhus då eit steinras sopa sleden ut i elva Jølstra. Dei tre vart funne omkomne i Movatnet nokre dagar seinare.

1832

I 1832 vart ein mann frå Klakegg drepen av bjørn under jakt i fjella ved Kandal i Breim (sjå eigen artikkel under Bjørnesoger i Jølster).

1836

I 1836 vart ein mann på Myklebust sterkt skada av ein skadeskoten slagbjørn og døydde kort tid etter åtaket av bjørnen (sjå eigen artikkel under Bjørnesoger i Jølster).

1854

I 1854 drukna ein mann og 2 gutar i Jølstravatnet då dei skulle ro til kyrkje på Ålhus.

1855

I 1855 omkom to mann på Grepstad i Stardalen under ei snøfonn medan dei køyrde høy frå støylen. Fleire vart tekne av fonna, men berga seg.

1861

Ved ein brann i matstova på garden Fuglehaug ved Skei i 1861 omkom mor Gjertrud Fuglehaug, sonen Ola og dotterdottera Ågote Klakegg.

1862

drukna to born då eit ras i fjellet Orkja førde til ei stor flodbylgje i Jølstravatnet. I Orkja har det gått store ras både i 1684, 1862 og 1959.

Raset på Heggheim 1868

Vinteren 1868 var den hardaste snøskredvinteren som ein kjenner til på Vestlandet. 150 menneske omkom. Særleg ille var det 6. februar. Då omkom 24 menneske i Stryn. Ulukker råka også Luster, Sogndal, Balestrand og Jølster.
Her tok Grønskredfonna med seg heile gardstunet på Indre Heggheim i Stardalen. 14 menneske omkom. I det eine tunet omkom mor, far og 6 born. Berre tre av dei som vart tekne i raset, kom frå ulukka i live. På 125-årsdagen reiste Varden Ungdomslag ein minnestein på Heggheim.

1888

I 1888 omkom to personar, den eine Rasmus Befring frå Stardalen, i ei skyteulukke i Bolsetkleiva på veganlegget Skei-Våtedalen.

1921

I 1921 drukna 5 ungdomar frå Ålhus i Jøstravatnet då dei skulle ro til dans i Sandalen.

1926

Vinteren 1926 gjekk to unge kvinner gjennom isen og drukna på Jølstravatnet ved Strand.

1969

I 1969 omkom to gutar frå Dvergsdal då dei køyrde i Jølstravatnet med bil.

1977

Veslejulaftan 1977 omkom 4 unge kvinner frå Askvoll då dei køyrde ut i Jølstravatnet ved Juklestad.

1992

Like før jul 1992 omkom 4 personar då dei ved ei utforkøyring like sør for Skei drukna i Jølstravatnet.

1999

I mai 1999 miste ein ung mann frå Florø livet då han som busspassasjer var råka av ein stein som rasa frå fjellet ved Kjøsnesfjorden.

2003

Den 21. juli 2003 omkom syskena Sverre J., Johanna Tomine og Bjarne Befring i Stardalen i Jølster i ein silo etter at dei vart forgifta av gass og deretter drukna i vatn i siloen.

I desember 2003 miste ein ung mann begge beina då bilen hans vart råka av ein kjempestein som rasa frå fjellet ved Kjøsnesfjorden.

2004

Den 13. mars 2004 omkom ein mann frå Breim i eit snøras i Fagredalen ved Dvergsdalsdalen. 11 andre i ei skigruppe frå Indre Sunnfjord Turlag vart også tekne av raset, men berga seg.