Kronborg og Reset industrifelt

På Kronborg bygde Berge & Co. stort forretningsbygg som husa eiga bilforretning, og dessutan Hafstad vidaregåande skule inntil den i 1999 flytta inn i nybygg nærare sentrum.

Eit anna bygg, reist av entreprenør Ola Drage, huser Førde Tekniske Fagskole. Drage bygde også nokre år seinare møbelhus for Bohus-kjeden (slegen saman med Idè i 2000 og flytta saman i Ida Berqvam sitt bygg i sentrum). Eit anna dominerande forretningsbygg på Kronborg er byggevare-forretninga Farsund Bygg.

På Reset bygde m.a. Vestlandske Salslag i Førde nytt storslakteri i 1984, og det 20 år gamle Sunnfjord Slakteri i sentrum vart kjøpt av Ida Berqvam og ombygd til Handelshuset, opna i 1987. Førde kommune bygde søppelforbrenningsanlegg på Reset, før det mellombels vart erstatta med fyllplass på Ulltang, og seinare med stort sentralanlegg i Hesjedalen ca. 6 km. nordvest for sentrum. Før Reset hadde kommunen deponert matavfall på Hafstadflatene og grovavfall på Hjelle.

Eit nytt industrifelt ved Moskog-krysset som kommunen sysla med på 1970-talet, har førebels ikkje blitt noko av. Derimot har strandsona langs Hornnes vorte regulert til ny industri.

SIVA-eigedomane vart i 1990 selde til Welcon-konsernet, eigd av Arne Stang frå Stongfjorden. Gjennom 1980- og 1990-tala har store deler av det gamle industifeltet Øyrane endra karakter frå industri til varehandel og tenesteytande bedrifter. I 1990 opna kompetansesenteret Concord, som huser Ingeniørhøgskulen og kring 20 rådgjevingsbedrifter.

To av kommunens største industribedrifter, Førde Sementvarefabrikk og Ramstad Eskefabrikk, har stort sett klart seg på eiga hand utanom dei kommunale industrifelta.

Karl Opseth starta i 1930 Førde Sementvarefabrikk AS på Steinen. Fabrikken vart flytta til Bruland i 1969. Der ligg store sandtak. Alfred Ramstad starta Ramstad Eskefabrikk på heimegarden i Angedalen i 1949. Der har verksemda halde til sidan, og er idag landets største norskeigde fabrikk i sitt slag.

Forrige side:
Vekstsenteret Førde