Steinindustrien i Ytre Ofredal

Kristian Offerdal engasjerte steinhoggarar frå Bergen og Østfold og bygde brakke og kai. I tillegg dreiv han uttak av labradorstein i Aurland i samarbeid med sambygdingen Mattias Asperheim. Offerdal selde i 1917 steinbrotet og vart disponent for Lerums Saftfabrikk i Kroken i Luster.

Sogn Steinindustri A/S tok over granittbrota, og bygde i tida fram til 1926 48 meters kai med store kranar, brakker som kunne husa 44 mann, og smie og bustad for arbeidsformannen. Dei engasjerte steinhoggarar heilt frå Sverige då drifta gjekk på det beste. I 1924 til 1926 dreiv selskapet også brot i Vikastrondi. Sogn Steinindustri la ned drifta i 1940.

I 1953 var Sogn Steinidustri i realiteten konkurs, og vart seld til holdingselskapet A/S Aurland som var eigd av Mowinkels Rederi i Bergen. Same året kjøpte den tidlegare arbeidsformannen Jakob Lemvik steinbrotet og anlegga i Ytre Ofredal. Han hadde i 20 år drive sitt private vesle steinhoggeri på Vikastrondi. Han leverte m.a. stein til Aberdeen og Bergen.

I 1962 leigde Lemvik steinbrotet bort til Kjell Magnus Steinsvik frå Molde. Steinsvik dreiv Hustad Kalk- og Marmor ved Hustadvika. Saman med Norway Stone A/S skipa han selskapet Sognegranitt A/S som dreiv i Ytre Ofredal i 3 år. Bak Norway Stone stod skipsreiar Sigval Bergesen, og i 1966 vart det investert 3 millionar kroner i steinindustrien i Årdal. Fleire kjende bygningar i Oslo sentrum fekk i denne tida fasadesteinen frå Ytre Ofredal, mellom andre Grand Hotel.

På 1980-talet vart det i ein kort periode drive sandtak i Ytre Ofredal.