Nitter-slekta kom til Noreg antan frå Flandern i Belgia, eller frå Skottland. Slekta slo seg opp som handelsmenn i Bergen og som store jordeigarar på Vestlandet - m.a. i Sogn, der
Henrik Nitter kom som den første og slo seg ned på garden Tandle i Gaupne i 1618.
 |
| Eldre foto av hotellet. (Foto © Walaker hotell) |
Saman med kona Birgitte kjøpte Christen Nitter garden Vollåker (Walaker) og kremmarstaden i Solvorn i 1696. Sidan har same slekta eigd og drive gjestgiveri og hotell.
Det vart den yngste sonen til Christen og Birgitte, Ludvig Nitter (1709-1776), som tok over handel og gjestgiveri Solvorn. Han fekk kongeleg løyve i 1734.
Ein eldre bror,
Trude Christenson Nitter reiste til Sunnfjord, der han kjøpte storgarden Tysse i Fjaler og vart stamfar til Sunnfjord-greina av Nitter-slekta.
Krangel på kroa
Det kunne gå hardt føre seg når folk fekk for mykje skjenk på dei lokale bygdekroene i gamle dagar. Slik var det også i skjenkestova i Solvorn. Her kunne både lysestakar, ølkrus og anna laust innbu fyke vegg imellom når gemytta kom ut av kontroll. I 1807 vart såleis "Kjørlogs-Erik" så hardt handtert på Solvorn-kroa av nokre Hafslo-karar at han døydde nokre dagar seinare av skadane.
Turistane kjem til Solvorn
Alt på 1850-talet kom dei første utanlandske turistane til Luster og Solvorn. I 1856 reiste engelske Emily Lowe over Sognefjellet og via Solvorn, og har skildra reisa og opphaldet på Walaker i boka "Unprotected Females in Norway".
 |
| Tingstova i Solvorn. (Foto: Arne Eithun, NRK) |
Fram til 1880-talet vart gjestane innhyste i to store sovesalar i den gamle tingstova - ein sal for kvinner og ein for menn. I 1880 vart salane delte inn i mindre rom.
I 1934 vart det meste av dei gamle bygningane rivne av dåverande eigarar Wilken og Inga Nitter. Saman med tingstova vart berre den gamle salongen bevart i det nye bygget som vart teikna av arkitekt Klaus Lindstrøm. Under krigen vart hotellet nytta som kaserne av tyskarane - sjå:
Krigshistoria i Luster.
 |
| (Foto: Heidi Lise Bakke, NRK © 2003) |
I 1964 vart anlegget utvida med eit motell på vestsida, og hotellet fekk etter dette 23 gjesterom. I 1978 vart gardsdrifta på Valaker skilt frå hotelldrifta ved at
Hermod Nitter Walaker vart eigar av hotellet og broren Erik tok garden.
Hermod Nitter Walaker og ektemaken Oddlaug bygde om den gamle låven frå 1882 til eit særmerkt kunstgalleri.
Tips andre om denne saken
Utskriftsvennlig versjon
